AGK reagon pas konferencës së Osmanit: Akuzat e insinuatat e saj rrezikojnë sigurinë e gazetarëve

Lajme

Gazeta Express

11/09/2025 13:57

Asociacioni i Gazetarëve të Kosovës ka reaguar pas konferencës së sotme te presidentes së Kosovës, Vjosa Osmani, e cila përsëri ka sulmuar gazetarët dhe ka ngritur pretendime pa ofruar asnjë provë dhe fakt, se kinse emrat e disave kanë dalë nga hetimet që po bëhen për Radojiçiqin.

AGK konsideron se akuzat dhe insinuatat e tilla rrezikojnë sigurinë e gazetarëve në Kosovë.

Reagimi i plotë:

 Akuzat dhe insinuatat e Presidentes Osmani rrezikojnë sigurinë fizike të gazetarëve

Presidentja e Kosovës, Vjosa Osmani ka vazhduar edhe këtë të enjte me deklarata thellësisht të papërgjegjshme për postin që mban, duke lidhur “disa gazetarë”  me “Radojçiqët” dhe me “grusht-shtet”.

AGK-ja e dënon ashpër retorikën akuzese dhe nxitëse të Presidentes Osmani gjatë konferencës për shtyp, pasi që ajo rrezikon direkt sigurinë fizike të gazetarëve.

Osmani u është referuar sërish raporteve të AKI-së për të forcuar  akzuat “për disa gazetarë”, për të cilat AGK mendon se vënë në pikpëyetje sigurinë juridike, jo vetëm të gazetarëve, por edhe të secilit qytetar të Kosovës.

AGK-ja fton organet e sigurisë të deklarohen për këto akuza kaq të rënda, që shërbejnë si intimidim i hapur ndaj gazetarëve, në përpjekje për të ndaluar punën e tyre për të bërë pyetje në interes të publikut.

AGK-ja e fton sërish Presidenten Osmani që të heqë dorë nga praktika jodemokratike e sulmeve ndaj gazetarëve dhe medieve, dhe të luajë rolin e saj kushtetues që garanton lirinë e medias dhe shprehjes.