Mitrovicë e Veriut: Policia sekuestron sasi të madhe të armëve dhe municionit, arrestohet një person

Lajme

Gazeta Express

11/09/2025 8:29

Një aksion i gjerë i Policisë së Kosovës në rajonin e Mitrovicës së Veriut ka rezultuar me bastisje në disa lokacione, ku janë sekuestruar armë, municion dhe pajisje të ndryshme ushtarake. Si rezultat i këtyre bastisjeve, një person është arrestuar, ndërsa në një rast tjetër është identifikuar një i dyshuar.

Në rastin e tretë të operacionit, Policia ka kontrolluar një shtëpi banimi në lagjen Korile, Komuna e Zveçanit, ku pronari i objektit ka njoftuar se posedonte dy armë me leje të UNMIK-ut, të cilat kishte deklaruar se i kishte transferuar në Serbi. Gjatë kontrollit, në shtëpi u gjet dhe u sekuestrua një sasi e vogël e municionit.

Duke u bazuar në informacione operative dhe me qëllim parandalimin e humbjes së mundshme të provave materiale, Policia ka kryer bastisje shtesë në objektet përcjellëse të të dyshuarit, në përputhje me nenin 108 të Kodit të Procedurës Penale – që lejon kontrollin dhe sekuestrimin e përkohshëm pa urdhër të gjykatës në raste urgjente.

Gjatë kontrollit janë sekuestruar këto materiale:

• Dy (2) karikatorë për armë të gjata
• 49 detonatorë elektrik
• Një (1) thikë
• Një këllëf për armë të gjatë
• Një fishek me mbishkrim “PPU 8×75 IS”
• Një fitil ngadalë ndezës me një detonator mekanik
• Gjashtë (6) detonatorë elektrik, katër prej tyre të rinj
• Dy paketime me sfera për mbushje fishekësh gjuetie
• Makineri për mbushje municioni
• Pjesë shtesë për armë të gjatë për përdorim me tromblon
• Tel për iniciim të detonatorëve
• Një armë e gjatë e çmontuar me numër serik K-414675 dhe dy karikatorë me gjithsej 60 fishekë të kalibrit 7.62×39
• 35 kuti të mbyllura me municion “IK 89” (525 fishekë të kalibrit 7.62×39)
• 59 fishekë me mbishkrim “E”
• 65 fishekë me mbishkrim “IK 89”
• 50 fishekë për pistoletë “PPU 9mm LUGER”
• Dy (2) karikatorë për armë të gjatë pa municion
• Pajisje për matjen e distancës
• Thikë për pushkë (bajonetë)

I dyshuari S.G., 73 vjeç, është arrestuar dhe pas intervistimit në prezencë të avokatit mbrojtës, me urdhër të Prokurorit të Shtetit i është caktuar masa e ndalimit prej 48 orësh. Ndaj tij është iniciuar rasti “Mbajtje në pronësi, kontroll ose posedim të paautorizuar të armëve”.

Në një tjetër rast, të identifikuar si Rasti VI, Policia ka kontrolluar një shtëpi në rrugën “Prote Stojana” në Zveçan, ku janë sekuestruar:

• Një pushkë gjuetie
• 12 fishekë për pushkë gjuetie
• 15 gëzhoja të kalibrave të ndryshëm
• 2 sfera për fishekë gjuetie
• Një rrip për mbajtjen e fishekëve

Në këtë rast nuk ka pasur arrestime, por Policia ka njoftuar se është në kërkim të një personi të dyshuar për t’u intervistuar lidhur me gjetjet. Edhe për këtë rast është iniciuar procedura penale “Mbajtje në pronësi, kontroll ose posedim të paautorizuar të armëve”.