LDK: Kuvendi nuk është konstituuar, çdo tentim për të interpretuar ndryshe përbën shkelje të rendit kushtetues

Lajme

Gazeta Express

30/08/2025 13:30

Lidhja Demokratike e Kosovës ka dalë me një komunikatë pas seancës së sotme të Kuvendit ku edhe pa u zgjedhur nënkryetari nga komuniteti serb, kryeparlamentari Dimal Basha tha se “konsideron” që seanca konstituive është përmbyllur.

LDK në komunikatë thekson se Kuvendi i Republikës së Kosovës ende nuk është konstituuar, duke shtuar se Kushtetuta e Republikës, Rregullorja e Kuvendit dhe aktgjykimet përkatëse të Gjykatës Kushtetuese “janë të qarta dhe pa ekuivok” sa i përket procedurave dhe kushteve të konstituimit të tij.

“Çdo tentim për të interpretuar ndryshe apo për të anashkaluar këto dispozita themelore përbën shkelje të rendit kushtetues dhe cenim të parimeve demokratike mbi të cilat mbështetet shteti ynë. Kuvendi nuk mund të funksionojë dhe të marrë vendime pa përmbushur më parë procesin e konstituimit, siç e përcaktojnë qartë Kushtetuta, Rregulloren e Punës së Kuvendit dhe aktgjykimet e Gjykatës Kushtetuese”.

LDK tha se vonesat e vazhdueshme në konstituimin e Kuvendit dhe në formimin e institucioneve përbëjnë një dëm të madh për vendin.

“Këto vonesa po pengojnë funksionimin normal të jetës institucionale dhe përgjegjësia e barra kushtetuese, politike e morale bie kryekëput mbi LVV-në dhe drejtuesin e saj”.

Lidhja Demokratike e Kosovës tha se mbetet “e përkushtuar për respektimin e plotë të rendit kushtetues dhe të rregullave demokratike, duke garantuar që institucionet e Republikës së Kosovës të veprojnë në përputhje me normat kushtetuese dhe të jenë shembull i funksionimit demokratik”.