Cakolli: ‘Shpikjet’ e Bashës s’kanë asnjë vlerë juridike, Kushtetuesja mund ta konstatojë të dështuar konstituimin e Kuvendit

Lajme

Gazeta Express

30/08/2025 12:47

Eugen Cakolli nga KDI tha se konstatimi i kryetarit të Kuvendit, Dimal Basha, se seanca konstituive është përmbyllë edhe pse nuk është zgjedhur nënkryetari i Kuvendit nga minoriteti serb.

Cakolli tha se ky konstatim, të cilin e konsideroi “shpikje” të kryeparlamentarit nuk ka asnjë vlerë juridike dhe se Kuvendi s’mund të procedojë tutje.

Ai tha se kriza mund të zgjidhet vetëm përmes një vendimi të Gjykatës Kushtetuese, e cila mund ta konstatojë se Kuvendi s’është konstituar brenda afatit ligjor prej 30 ditësh ose mund të shpallë të pavlefshme votimin për nënkryetarët e komuniteteve.

“Seanca konstituive nuk mund të konsiderohet e përmbyllur pa zgjedhjen e të gjithë nënkryetarëve. Rrjedhimisht, nuk mund të ketë materializim të asgjëje – as zhvillim të procedurave apo ushtrim të funksioneve parlamentare, e as rrjedhje të afateve kushtetuese. Konstatimet (lexo: “shpikjet”) e fundit të Kryetarit nuk kanë asnjë vlerë juridike. I tërë ky non-sens politik tashmë mund të zgjidhet vetëm nga Gjykata – qoftë me konstatim të dështimit të konstituimit të Kuvendit brenda afatit 30-ditor, ose me shpallje të pavlefshme dhe përsëritje të procedurës së votimit për nënkryetarët e komuniteteve”.

Cakolli tha se ajo që ka rëndësi është të theksohet se sot, edhe një herë tjetër, “u vulos fakti se deputetët e kësaj legjislature nuk i meritojnë ato pozita e funksione, e as qytetarët nuk e meritojnë një legjislaturë kaq absurde”./Express/