Forma e lojtarëve të Kosovës para ndeshjeve të shtatorit – si po e kalojnë fillimin e këtij sezoni?

Sport

Blerian Dushica

30/08/2025 13:00

Kombëtarja e Kosovës muajin e ardhshëm do të nisë kualifikimet e Kampionatit Botëror 2026, që mbahet në ShBA, Kanada dhe Meksikë.

Më saktësisht, Kosova do të nisë këtë kampanjë kualifikuese me ndeshjen ndaj Zvicrës në Basel më 5 shtator, teksa tri ditë më vonë i bënë konak Suedisë në “Fadil Vokrri”.

Për këto dy ndeshje të rëndësishme të kombëares dardane, përzgjedhësi Franco Foda ka bërë “zgjedhjet” e tij, duke ftuar 26 futbollistë.

Prej tyre janë edhe dy të rinj, që vijnë te Kosova për herë të parë. Bëhet fjalë për shumë të përfolurin Leon Avdullahun, i cili para pak ditësh e refuzoi Zvicrën për të ardhur te “Dardanët”.

Emri tjetër është Veldin Hodza, futbollisti i Rubin Kazanit, i cili ishte pjesë e grupmoshave të Kroacisë.

Milot Rashica nuk është ftuar fare, dhe sipas disa raportimeve të fundit, bëhet me dije se mungesa e tij vjen nga vuajtja e një lëndimi.

Edon Zhegrova rikthehet pas dy grumbullimeve mungesë – gjatë muajit mars dhe qershor.

“Gazeta Express” u sjell formën e lojtarëve të ftuar të Kosovës gjatë këtij fillimsezoni, para ndeshjeve të shtatorit ndaj dy kundërshtarëve jo të lehtë.

PORTIERË:

Arijanet Muric: Natyrisht, Arijanet Muric është numri një i portës dardane. Ai është mes shtyllave për Kosovën që nga viti 2018. Për verën e dytë radhazi, Muric bëri një lëvizje në karrierën e tij. Ai u largua nga futbolli anglez – nga Ipsëich Toën – dhe u transferua te Sassuolo në Serie A. Në dy ndeshjet e para të klubit të sapoinkuadruar në elitë, Muric ishte në bankën rezervë, teksa mbrëmë debutoi në Serie A. Fatkeqësisht qe një debutim për t’u harruar, pasi Muric pësoi tre gola nga Cremonese, dhe një prej tyre një penallti në minutat e fundit të ndeshjes.

Amir Saipi: Saipi e ka nisur më herët sezonin e ri. Ai me Luganon ishin pjesë e kualifikimeve të Ligës së Evropës dhe Ligës së Konferencës, por pa arritur që të kenë sukses. Saipi deri më tani këtë sezon ka shtatë paraqitje në të gjitha garat. Paraqitjen më të mirë të këtij sezoni, Saipi e ka kundër kampionit në fuqi të Zvicrës, Baselit, në të cilën ndeshje Lugano fitoi 3-1.

Visar Bekaj: Portieri i tretë i kombëtares, Bekaj ka nisur tashmë të konsolidohet si startues në ekipin e tij, Hatayspor. Pas dy sezonesh me pak ndeshje të luajtura, tashmë 28-vjeçari po shihet si numri një i portës, nga skuadra turke. Në këtë fillimsezoni në Ligën e Dytë të Turqisë, Bekaj ka tri paraqitje, derisa me ekipin e tij kanë humbur dy ndeshje, dhe një e kanë barazuar. Në këto ndeshje, Bekaj i ka pësuar gjashtë gola. Në anën tjetër, Bekaj ka arritur të regjistrojë 15 pritje nga 21 goditje që kanë shkuar në drejtim të tij.

MBROJTËSIT:

Mërgim Vojvoda: Nuk po e themi ne, po e thonë në Itali: Vojvoda po del të jetë shumë i rëndësishëm për skuadrën e Comos, e drejtuar nga Cesc Fabregas. Që nga kalimi i tij nga Torino në janar, Vojvoda ka treguar paraqitje mjaft të mira me klubin simpatik të Comos. 30-vjeçari ka dy paraqitje deri më tani në futbollin italian – një në Kupën e Italisë e një në Serie A. Në ndeshjen ndaj Sudtirol në Kupën e Italisë, Vojvoda arriti të regjistrojë edhe një asistim. Në ndeshjen ndaj Lazios në xhiron e parë të Serie A, Vojvoda pati një paraqitje mjaft të mirë, e cila u vlerësua me notën prej 7.5 nga “FlashScore”.

Florent Hadërgjonaj: 31-vjeçari është pjesë e Alanyaspor në Superligën turke, me të cilën tashmë ka djersitur dy herë fanelën në sezonin e ri. Në ndeshjen e fundit, Hadërgjonaj shënoi madje gol – nga penalltia – në humbjen 2-1 prej Eyupspor.

Amir Rrahmani: Rrahmani po ashtu tashmë e ka nisur sezonin e ri me Napolin, duke e nisur mbrojtjen e titullit kampion me një fitore si mysafirë të Sassuolos xhiron e kaluar. 31-vjeçari u vlerësua me notë prej 7.8 nga “Flashscore” për ndeshjen ndaj Sassuolos. Ndeshjen e fundit para grumbullimit me Kosovën, Amir Rrahmani e zhvillon sonte ndaj Cagliarit në “Diego Armando Maradona”.

Lumbardh Dellova: Dellova ishte në qendër të vëmendjes edhe të mediave shqiptare, por edhe atyre bullgare, pasi raportohej se është afër largimit nga CSKA Sofia. Mirëpo duket se mbrojtësi dardan do të mbetet në futbollin bullgar. Ai deri më tash ka zhvilluar pesë paraqitje në ligë me CSKA Sofian, duke mos arritur asnjë fitore, pos tri barazimeve e dy humbjeve.

Ilir Krasniqi: Kolos Kovalivka po tregon paraqitje mjaft të mira në këtë fillimsezoni, duke fituar dy nga tri ndeshjet e para, e duke barazuar në një. Kjo, normalisht që vjen pas paraqitjeve të mira edhe nga lojtarët në fushën e lojës, aty ku është edhe Ilir Krasniqi, i cili ka luajtur çdo minutë të mundshëm në këto tri ndeshje.

Fidan Aliti: Edhe Aliti është pjesë e Alanyaspor në Superligën e Turqisë. Në ndeshjen e parë të sezonit ndaj Rizespor, Aliti u vlerësua me notën 7.1 nga “Flashscore”, ndërsa në të dytën ishte më i dobët, duke marrë vetëm 6.0. Aliti rikthehet te Kosova pasi nuk u ftua në ndeshjet e qershorit.

Leart Paqarada: Paqarada nuk e ka asnjë paraqitje në sezonin e ri në Bundesliga, pasi iu kumtua lajmi nga Kolni se është i padëshirueshëm në ekip. Ai u hudh në aksion për të gjetur një klub të ri. Paqarada u transferua te Heidenheimi, po ashtu në Bundesliga dhe mund të debutojë në këtë fundjavë. Minutat e fundit në këmbët e tij, Paqarada i ka në një ndeshje miqësore ndaj Atalantas më 9 gusht.

Dion Gallapeni: 20-vjeçari duket se është përshtatur mjaft mirë në Poloni. Në dy ndeshjet e para, Gallapeni ishte në bankën rezervë, mirëpo tash e katër ndeshje ka nisur të zë vendin startues. Në ndeshjen e fundit madje, mbrojtësi i ri kosovar arriti të shënojë gol. Ndeshjen e fundit para se të vijë te Kosova, Gallapeni e zhvillon ndaj Lech Poznan me Widzew Lodzin më 31 gusht.

MESFUSHORËT:

Elvis Rexhbeçaj: Mesfushori 27-vjeçar këtë sezon nuk po gjen hapësira tek Augsburgu. Në dy ndeshje zyrtare në Gjermani, mesfushori dardan ka luajtur vetëm 21 minuta. Këto minuta erdhën në ndeshjen e javës së kaluar ndaj Freiburgut, që Augsburgu e fitoi 3-1.

Valon Berisha: Mesfushori 32-vjeçar ka luajtur në tri nga pesë ndeshjet e para të sezonit të ri me Lask Linz. Një prej tyre madje e ka kompletuar, në humbjen 3-0 nga Salzburgu. Berisha nuk ka arritur të kontribuojë me asnjë gol e asnjë asist në këto ndeshje.

Veldin Hodza: Mesfushori 22-vjeçar po e zhvillon sezonin e tij të dytë me Rubin Kazanin, që nga transferimi i tij nga Rijeka. Hodza ka luajtur në gjashtë ndeshje në ligë dhe tri në Kupën e Rusisë. Në këto ndeshje, mesfushori i ri dardan ka arritur të shënojë dy gola.

Lindon Emërllahu: Mesfushori i ri e nisi sezoni e ri me Clujin në fillim të korrikut, por pas katër ndeshjeve e pësoi një lëndim, që e mbajti jashtë fushave për gjashtë ndeshje. Që nga rikthimi i tij, Emërllahu ka shënuar një gol, mirëpo Cluji po kalon një krizë rezultatesh, duke bërë që të eliminohen edhe nga Liga e Konferencës.

Leon Avdullahu: 21-vjeçari këtë verë kaloi nga kampioni i Zvicrës, Baseli te Hoffenheimi. Kosovën e pranoi para disa ditësh, edhe pse në tavolinë e pati edhe ftesën e kombëtares zvicerane. Me klubin e tij të ri, Avdullahu është paraqitur në dy ndeshje, duke patur paraqitje të mira. Madje, ishte pjesë e fushës së lojës kur Hoffenheim e mposhti Bayer Leverkusenin si mysafir. Forcë shtesë për Franco Fodën në këto ndeshje me shumë rëndësi.

Meriton Korenica: 28-vjeçari është lojtari më i mirë i Clujit momentalisht, edhe pse klubi rumun po kalon në rezultate jo të mira. Korenica në pesë ndeshjet e fundit ka shënuar tre gola dhe ka dhuruar një asistim.

Muharrem Jashari: Mesfushori ia besoi të ardhmen e tij LNZ Cherkasyt, duke nënshkruar kontratë të re, që e mbanë atë në klub deri në vitin 2026. Në sezonin e ri, Jashari ka zhvilluar dy ndeshje, teksa në një e ka gjetur edhe golin.

SULMUESIT:

Edon Zhegrova: Sulmuesi anësor i Kosovës nuk ka zhvilluar ndeshje zyrtare që nga dhjetori i vitit të kaluar, kur pësoi një lëndim në ndeshjen ndaj Marseille. Që një muaj, Zhegrova është kthyer në stërvitje, teksa në javën e kaluar është ftuar edhe për ndeshjen ndaj Monacos me Lille, mirëpo nuk luajti. Mundësi që ai të ketë minuta ka këtë fundjavë. Zhegrova gjithashtu po lidhet me një kalim pikërisht te Marseille, pasi sipas raportimeve nga Franca, transferimi te Juventusi nuk pritet të ndodhë.

Vedat Muriqi: “Pirati” dardan e ka nisur si mos më keq sezonin e ri me Mallorcan. Muriqi u ndëshkua me të kuq në pjesën e parë ndaj Barcelonës, në xhiron hapëse të La Ligas, gjë që bëri që ai të mungojë në xhiron e dytë.

Albion Rrahmani: “Lewandowski” i Sparta Pragës ka arritur që të rikthejë formën e tij të dikurshme, duke shënuar tre gola në gjashtë ndeshjet e para në ligë, teksa po aq gola i ka shënuar edhe në gjashtë ndeshje në kualifikimet evropiane.

Ermal Krasniqi: Deri para pak ditësh, Krasniqi ishte bashkëlojtar i Rrahmanit te Sparta Pragës, tashmë ka kaluar te Legia e Varshavës. Në Çeki, Krasniqi pati vetëm dy paraqitje në këtë sezon të ri, duke shënuar një gol në kualifikimet e Ligës së Konferencës.

Florian Haxha: Anësori 23-vjeçar ka vetëm dy paraqitje (31 minuta total) në pesë ndeshjet e para me Motor Lublin në elitën e futbollit polak.

Baton Zabërgja: Sulmuesi 24-vjeçar tregoi paraqitje fantastike me skuadrën e Dinamo Cityt në kualifikimet e Ligës së Konferencës gjatë kësaj vere. Në katër ndeshje, Zabërgja shënoi tre gola, madje një ndaj Hajduk Splitit. Tash, ai ka kaluar te Metalist 1925 në Ukrainë.

Fisnik Asllani: Pas suksesit në aspektin individual sezonin e kaluar me Elversbergun në Bundesliga 2, Hoffenheimi vendosi ta mbajë Asllanin në skuadër për sezonin e ri. Dhe, ai po ia shpërblen këtë të mirë klubit gjerman. Sulmuesi i ri shënoi në debutim me klubin e Hoffenheimit dhe në Bundesliga, duke gjetur golin ndaj Bayer Leverkusenit.

Florent Muslija: Vitet e tij të kaluara në Freiburg ishin të çuara dëm. Gjatë kësaj vere, pas mungesës së minutazhës, Muslija kaloi te Fortuna Dusseldorf në formë huazimi. Në dy ndeshjet e para, Muslija ka shënuar dy gola dhe ka regjistruar një asistim, duke rikthyer formën e tij, para ndeshjeve të shtatorit./GazetaExpress/