Një mijë € për tendën e lokalit në Kombinat, vetëdorëzohet inspektori i IMT-së Zhilla, Gjykata lë në burg kolegun e tij

Shqiperi

Gazeta Express

30/08/2025 11:39

Punonjësi i Inspektoratit të Mbrojtjes së Territorit (IMT) Tiranë, Klajdi Zhilla, i shpallur në kërkim për marrjen e 1 mijë eurove ryshfet në zonën e Kombinatit, është vetëdorëzuar në polici. Ai është paraqitur mbrëmjen e së premtes në komisariat, i shoqëruar nga avokati i tij, Andi Skënderi.

Zhilla u shpall në kërkim pas operacionit të policisë, ku dyshohet se mori nga pronari i një lokali shumën prej 1 mijë eurosh për të mos prishur tendën pa leje. Inspektori arriti të largohej në momentin e ndërhyrjes, ndërsa kolegët e tij u ndaluan në flagrancë.

Në dëshminë paraprake, Zhilla ka pretenduar se nuk e dinte që ishte në kërkim dhe se lajmin e mësoi nga mediat. Ai ishte pjesë e IMT-së vetëm prej dy muajsh.

Ndërkohë, sot Gjykata e Posaçme (GJKKO) ka lënë në fuqi masën e sigurisë “arrest në burg” për inspektorin tjetër, Geraldo Fuçia, i cili akuzohet si personi që i kërkoi paratë pronarit të lokalit.

“Nuk e njoh fare qytetarin, as e kam kontaktuar, as takuar, as nuk di gjë për rryshfetin. Deklaroj me përgjegjësi morale dhe ligjore se nuk kam lidhje me këtë histori. Unë e ushtroj detyrën me seriozitet dhe profesionalizëm, si në dhjetëra raste të tjera të aksionit për lirimin e hapësirave publike”, ka deklaruar Fuçia para gjykatës.

Avokatët e tij kërkuan një masë më të butë sigurie deri në sqarimin e plotë të rrethanave, por kërkesa u rrëzua nga trupa gjyqësore.

Hetimet nisën pas kallëzimit të vetë pronarit të lokalit, i cili denoncoi marrëveshjen e kërkuar nga inspektorët. Me miratimin e SPAK-ut, u kryen përgjime dhe më pas një simulim i dhënies së parave.