Viti i ri shkollor në Prishtinë, shtohen shtatë shkolla me mësim tërëditor

Lajme

Gazeta Express

30/08/2025 10:20

Të hënën fillon viti i ri shkollor 2025-2026 e nga Komuna e Prishtinës shprehën të gatshëm për ecuri të mbarë të këtij procesi. Nga ky vit shkollor në kryeqytet do të aplikohet mësimi tërëditor edhe në shtatë shkolla të tjera, prej tyre pesë janë në zonat rurale.

Drejtori për Arsim në Komunën e Prishtinës, Samir Shahini deklaroi se me sukses kanë përmbyllur të gjitha ndërhyrjet në shkolla, por edhe është bërë rekrutimi i mësimdhënësve dhe pranimi i nxënësve në çerdhe dhe kopshte.

Komuna e Prishtinës po planifikon që mësimin tërëditor gjatë vitit shkollor 2025-2026 ta shtrijë edhe në shtatë shkolla të tjera.

Sipas udhëheqësit të Arsimit në Prishtinë, Samir Shahini, mësimi gjithëditor ka përmirësuar ekonomitë familjare.

Shahini në një intervistë për KosovaPress, tregon se orari i mësimit tërëditor për klasat 1 dhe 2 është deri në ora 14:30, ndërsa për nxënësit e klasave 3, 4 dhe 5 është deri në 15:30.

Me qëllim që programi i mësimit gjithëditor të jetë pjesë e të gjitha shkollave në gjithë vendin, Shahini e sheh urgjente hartimin e një udhëzimi administrativ që parasheh buxhetimin për të ndihmuar komunat.

Tash e tri vite, Ministria e Arsimit, Shkencës, Teknologjisë dhe Inovacionit ka nisur subvencionimin e familjeve për blerjen e librave, për dallim nga vitet e mëhershme kur librat nga klasa 1 deri në 9 ofroheshin nga shkollat falas.

E metoda e viteve të fundit për sigurimin e librave për ciklin e ulët dhe atë të mesëm të ulët, nga drejtori i Arsimit në Prishtinë, Samir Shahini, po konsiderohet sa e gabuar aq e dëmshme.

Tekstet dhe materialet e tjera shkollore për nxënësit nga klasa e parë deri në të nëntën edhe këtë vit financohen nga Qeveria e Kosovës.

Sikurse vitin e kaluar, paratë janë transferuar në llogaritë bankare të prindërve, në mënyrë që ata t’i blejnë vetë librat për fëmijë./KP/