Dorëheqja që preku themelet e VV’së, Kurti përpiqet ta minimizojë largimin e Liburn Aliut, e paraqet si lehtësisht të zëvendësueshëm

Lajme

Gazeta Express

29/08/2025 18:53

Liburn Aliu është dorëhequr pardje nga posti i  Ministrisë së Infrastrukturës. Ky ishte lajmi i ditës të mërkurën që eklipsoi edhe zgjedhjen e kryetarit të kuvendit Dimal Basha një ditë më herët.

Ali u kujdes vetë ta bëjë të qartë se cila ishte edhe arsyeja e dorëheqjes së tij, edhe pse komentatorët nëpër studio nuk u bindën tërësisht nga shpjegimi tij, bazuar në historikun e fundit të raporteve me partinë dhe Kurtin.

“Dorëheqja ime vjen pas zgjedhjes së djeshme të kryetarit te Kuvendit të Republikës së Kosovës. Dje, pas votimit te kryetarit të Kuvendit, e kam njoftuar Kryeministrin Kurti për vendimin tim” shkroi ai.

Aliu elaboroi edhe më tej.

“Konsideroj që zgjedhja e djeshme e Kryetarit të Kuvendit, institucionit më të lartë, ku vendosen ligjet dhe jep llogari qeveria, nuk është në frymën e në lartësinë e atij ideali për Republikën që ka qenë dhe mbetet arsye angazhimi për mua”.

Liburn Aliu ishte njëri prej figurave themeluese të Lëvizjes Vetëvendosje. Dy ditët e fundit, nëpër rrjetet sociale kanë qarkulluar video nëpër rrjetet sociale ku Aliu shpesh ka qenë figura kryesore në përballjet opozitare ndaj pushtetit.

Në njërën prej tyre Aliu shihej i përgjakur nga shtyrja me policinë që përpiqej ta arresonte.

Në një nga paraqitjet e tij, Liburn Aliu e kishte dhënë detaje të përfshirjes në atë që më vonë u bë Vetëvendosje.

“Shumica prej nesh i lanë edhe punët e tyre për tu marrë me organizatën. Nuk kishim fare donacione, ishim të limituar. Kujtoj se na ndihmonin edhe të blinim sprejin. Unë kisha fatin se gruaja punonte, dhe i tregova asaj se dëshiroja të angazhohem intensivisht me organizatën, dhe fatmirësisht ajo u pajtua me mua”, shpjegonte ai.

Por, në vitin 2025, kur Kurti është Kryeministër në largim dhe idealet e VV’së së dikurshme kanë mbetur larg në kohë, s’ka mbetur shumë as nga solidariteti dhe kolegjialiteti i organizatës.

Kurti pati veç një fjali të shkurtër duke treguar se shumë shpejt ia ka gjetur zëvendësimin.

“E falënderoj ish – ministrin për kontributin. Ne duhet të vazhdojmë përpara, pa humbur kohë e kam emëruar në këtë detyrë zëvendësministrin Hysen Durmishi”, tha ai.

Se cila mund të jetë historia që çoi në largimin e Aliut nga Qeveria ndoshta ndonjëherë do ta shpjegojë vetë ministri, por vitet e fundit miqtë e moçëm, s’kanë qenë gjithherë të një mendimi.

 Një situatë që bëri lajm ishte lënia jashtë e Aliut nga kryesia e kësaj partie. Pozitën e nënkryetarit që kishte Liburn Aliu në VV, e mori Glauk Konjufca.

Por, kjo s’është e tëra. Në muajt që pasuan, qytetarët panë edhe qëndrime të drejtpërdrejta kundër njëri tjetrit, nga Aliu drejtuar Kurtit.

Një nga to është çështja e zgjedhjeve në Luginë të Preshevës, në të cilat Kurti ishte vënë në krah të një partie atje. “Nuk po mund të rri neutral në këtë pikë pasi që jam me origjinë nga Presheva, pavarësisht orientimit dhe simpatisë personale, po mendoj se kjo ka qenë gabim dhe veprim i gabueshëm. Ky ka qenë gabim dhe ky duhet të rregullohet sa më parë”, kishte thënë Aliu në RTK.

Tjetër qëndrim kundër Kurtit, Aliu e kishte dhënë edhe lidhur me projektin e autostradës së Gjilanit, për përfundimin e secilës kryeministri në detyrë e kishte dhënë një datë. Për këtë, Aliu e kishte përgënjeshtruar Kurtin, duke thënë se ka qenë gabim të jepet data. “Mendoj që ka një progres të madh, por s’mundem me ju dhanë datë. Kur iu është dhënë premtimi që do të kryhet ka qenë një gabim dhe as për së afërmi nuk ka qenë gati”, kishte thënë Aliu.

Për ‘telashet e fshehta’ mes Kurtit e Aliut, ka pasur edhe deklarime nëpër studio televizive. Një nga to ka qenë në T7, ku gazetari Baton Hashiu kishte folur për një ‘sekret publik’ duke thënë se Aliu ka ofruar dy herë dorëheqjen më herët, por që s’ishte pranuar.

 “E para Lista e Vetëvendosjes, nuk ka ndëshkim për qeverisje të keqe. Të gjithë ministrat e VV-së të cilët kanë tregu mos-suksesin më të madh që prej pasluftës në qeverisjen e tyre janë në listë. Liburn Aliu për arsye që e ka pas, që dy vjet më herët një përplase, e cila ka qenë e heshtuar, ai ka paraqitur dy herë dorëheqje dhe nuk i është pranuar. Ky është një sekret publik”, kishte thënë Haxhiu në Pressing.

Aliu po ashtu nuk është përfshirë as në listën zgjedhore të VV’së për zgjedhjet e 9 shkurtit.

Për një raport jo të mirë mes miqve të moçëm ka pasur deklarim edhe nga ish-deputet të LVV’së. Haki Abazi, po ashtu në T7 kishte deklaruar se se problemi mes Kurtit dhe Aliut është i hershëm.

“Problemi me Liburnin është shumë më i hershëm realisht, ideja që përplasja ka ardhur si rezultat i një mosdëgjuesmërie të Liburnit ndaj dorës autoritare ndaj kurtit”, ka thënë Abazi.

Raportet mes të dyve kishin hasur kriza të tjera ndërkohë. Lidhur me një nga skandalet e publikuara gjatë këtyre viteve të njohura si “Jaranat e Liburnit”, ishte raportuar për përkeqësim të raporteve mes të dyve. Siç raportonte Nacionale, Kurti në një bisedë e kishte akuzuar Aliun se po “qëndronte” në ndeja me oligarkë.

Ka pasur edhe një situatë tjetër për të cilën Aliu ishte kritikuar mjaftë shumë. Deklarata e tij për Kosovën si shtet i përkohshëm kishte bërë bujë.

Për këtë, Kurti s’ishte deklaruar aq, duke thënë se nuk e ka parë emisionin ku e kishte bërë deklaratën Aliu.

“Nuk po më duket e përshtatshme që unë të bëj komente për emisione televizive që të them të drejtën nuk i kam pa. Por zëdhënësi im, Përparim Kryeziu, më tha që ai ka qenë një emision le të themi festiv në ditët e festës së Flamurit dhe pavarësisë së 28 Nëntorit. Por këtu sot jemi në Gjilan për punë që po bëhen për qytetarët në të mirën e tyre dhe ky është përqendrimi ynë”, kishte thënë Kurti.

Nga e gjitha kjo, largimi i Aliu mund të thuhet se është shpërfaqje e një krize mes tij dhe Kurtit. Ndërsa sa i përket një krize të thellë në parti, për momentin mund vetëm të aludohet.

Megjithatë, deri tani, aludimet për pakënaqësi në VV kanë bazën që quhet Dimal Basha. Zgjedhja e këtij të fundit në krye të kuvendit s’është përcjellur me urime edhe aq nga anëtarët e VV-së. Madje një i tillë s’është bërë as nga vetë Kurti. /GazetaExpress