Policia e Kosovës ngre alarmin për sigurinë e fëmijëve në internet: Raste të rënda vetëlëndimi

Lajme

Gazeta Express

29/08/2025 12:12

Policia e Kosovës ka njoftuar se së fundi ka trajtuar disa raste shqetësuese, ku fëmijë kanë bërë postime në internet që lidhen me vetëlëndim dhe vetëvrasje.

Përmes një komunikate nga Policia e Kosovës është bërë e ditur se falë edhe bashkëpunimit me qytetarë dhe institucionet relevante, policia ka arritur të identifikojë fëmijët e rrezikuar dhe të sigurojë prezencën e tyre, teksa shtohet se janë njoftuar prindërit dhe mekanizmat tjerë përgjegjës për trajtim të duhur të rasteve.

Në komunikatë policia i’u bënë thirrje prindërve që të kujdesen për fëmijët e tyre se çfatë bëjnë dhe postojnë ata në internet për parandalimin e rreziqeve që vinë nga internet.

Komunikata e plotë:

Policia e Kosovës, në kuadër të bashkëpunimit me qytetarët dhe institucionet e ndryshme, së fundi ka trajtuar disa raste ku janë shfaqur postime në internet nga fëmijët për vetëlëndim me pasoja të rënda shëndetësore, por edhe postime që kanë të bëjnë me vetëvrasjen.

Falë edhe bashkëpunimit me qytetarë dhe institucionet relevante, Policia e Kosovës ka arritur të identifikojë fëmijët e rrezikuar dhe të sigurojë prezencën e tyre. Janë njoftuar prindërit dhe mekanizmat tjerë përgjegjës për trajtim të duhur të rasteve.

Policia e Kosovës falënderon qytetarët dhe institucionet e ndryshme për bashkëpunimin dhe kontributin për të krijuar një ambient sa më sigurt në internet, me theks të veçantë për fëmijët.

Njëkohësisht, me qëllim që të parandalohen rreziqet në internet që iu shfaqen fëmijëve, Policia e Kosovës iu bën thirrje të gjithë qytetarëve, posaçërisht prindërve, që të kujdesen për fëmijët e tyre se çfarë bëjnë dhe postojnë në internet.

Këshilla dhe kërkesë për prindërit dhe fëmijët për përdorim të drejtë dhe të sigurt të internetit:

-prindër, flisni kohë pas kohe me fëmijët tuaj për rreziqet në internet, monitoroni se çfarë aktivitetesh bëjnë në internet, sepse kjo mund të parandalojë një të keqe, qoftë ndaj fëmijës suaj apo fëmijëve tjerë;

-kujdesuni se çfarë foto, video apo materiale tjera posedojnë fëmijët tuaj në telefonat dhe pajisjet e tjera kompjuterike;

-sigurohuni që fëmijët tuaj nuk janë duke luajtur ndonjë lojë të rrezikshme;

-fëmijë, KUJDES me kë shoqëroheni në internet dhe i ndani të dhënat tuaja personale, asnjëherë mos u takoni fizikisht me persona të panjohur që jeni njoftuar në internet, pa iu treguar prindërve;

-kujdes çfarë postoni në rrjete sociale;

-mos ngacmoni të tjerët në internet;

-mos shkarkoni dhe mos shpërndani video dhe fotografi me përmbajtje të abuzimit të fëmijëve;

-mos luani lojëra që kërkojnë të kaloni sfida dhe të lëndoni veten;

-mos qëndroni gjatë dhe pa arsye në internet;

-çfarëdo shqetësimi që keni, bisedoni menjëherë me prindin, shokun apo shoqen. Ju gjithashtu mund të lajmëroni Policinë në çdo kohë!