Arrestimi nën dyshimet për spiunazh, piloti kroat dinte gjithçka për manovrat e të dashurës serbe

Lajme

Gazeta Express

29/08/2025 8:32

Një aferë dashurore me përmasa ndërkombëtare, që po trondit rajonin, ka shpërthyer në Kroaci pas arrestimit të një piloti të Forcës Ajrore Kroate dhe partneres së tij, një shtetase serbe me prejardhje nga Mitrovica e Kosovës, të dy të dyshuar për spiunazh.

Sipas medias kroate Slobodna Dalmacija, piloti 54-vjeçar J.I. nga Spliti dhe partnerja e tij 46-vjeçare A.M., një sociologe e papunë, janë arrestuar dhe ndodhen në paraburgim në burgun e Bilicës, pas vendimit të gjykatësit të Gjykatës së Qarkut në Split. Dyshimet ndaj tyre janë të rënda: ata akuzohen për përfshirje në rrjet spiunazhi që lidhet me Listën Serbe, partinë politike të afërt me presidentin serb Aleksandar Vuçiq, dhe persona të konsideruar si liderë të organizatave serbe ekstremiste në Kosovë.

Piloti kroat, një ish-pjesëtar i misioneve paqeruajtëse të KFOR-it në Kosovë dhe në Afganistan, akuzohet se i ka transmetuar partnereve të tij informacione konfidenciale mbi lëvizjen dhe dislokimin e trupave të KFOR-it në Kosovë. Ajo, sipas Prokurorisë, i ka dërguar këto të dhëna përmes aplikacioneve të koduara drejt strukturave të afërta me Beogradin.

Nga hetimet rezulton se dyshja janë njohur në vitin 2016 në Kosovë, kur piloti ishte pjesë e kontingjentit kroat në kuadër të KFOR-it, ndërsa A.M. punonte si përkthyese në misionin e BE-së për sundimin e ligjit – EULEX. Më tej, marrëdhënia e tyre ka vazhduar dhe, siç duket nga provat, është shndërruar në një bashkëpunim të dyshimtë.

Ironikisht, vetë piloti dyshohet se ka pasur dyshime për aktivitetet e partneres së tij, madje ka deklaruar se ajo mund të ishte e përfshirë në “tregti informacionesh të ndjeshme”. Megjithatë, ai nuk e ka raportuar kurrë këtë fakt autoriteteve, duke ngritur pikëpyetje të mëdha për qëllimet dhe përfshirjen e tij të mundshme.

Mediumi kroat shkruan se rasti sjell në mendje fjalinë ikonike nga filmi “Balkanski Spiun”, ku aktori Danilo Bata Stojkovic thotë: “Në këtë punë ekziston një rregull themelor dhe i shenjtë: gjithçka është e kundërta e asaj që duket”.

Pikërisht kështu sipas SD,  mund të përshkruhet kjo aferë dashurore dhe spiunazhi, që përfshin informacione ushtarake, përplasje gjeopolitike dhe lidhje të errëta me struktura radikale.

Për momentin, që të dy janë në paraburgim – piloti për shkak të rrezikut të ndikimit ndaj dëshmitarëve, ndërsa partnerja e tij për shkak të rrezikut të arratisjes. Ajo është shtetase e Serbisë dhe nuk ka asnjë lidhje ligjore, familjare apo ekonomike me Kroacinë. Autoritetet kroate e konsiderojnë si të mundshëm largimin e saj nëse lirohet.

Gjatë mbrojtjes, e dyshuara ka befasuar hetuesit duke deklaruar se punon për shërbimin sekret gjerman – BND. Një deklaratë që, nëse provohet, do të kishte pasoja të rënda diplomatike, pasi Gjermania është një nga vendet kryesore në misionin KFOR dhe mbështetëse e madhe e Kosovës.

Sipas akuzës, e dyshuara ka qenë në komunikim të drejtpërdrejtë me Vladimir Radivojevic, i njohur si “Mami”, një figurë kyçe në organizatën “Brigada Veriore”, e cila vepron në veri të Kosovës dhe është e lidhur me aktet e dhunshme dhe kundërshtimin e autoritetit të Prishtinës. Ajo i kishte shkruar atij më 25 dhjetor 2022, duke thënë se “serbët duhet të godasin KFOR-in si të dinë dhe si të munden”, ndërsa piloti i kishte dërguar një mesazh të tipit “mbrëmë vërtet e prishëm punën”.

Emri i Mamijes përmendet edhe në aktakuzën e ngritur nga Prokuroria Speciale e Kosovës për sulmin terrorist në Banjskë më 24 shtator 2023, ku u vranë katër persona, përfshirë një polic të Kosovës. Më shumë se 40 persona janë nën akuzë në këtë rast, dhe lidhjet e të dyshuarës me këtë rreth shtrijnë edhe më tej hijet mbi këtë rast.