Argjentina shpall listën për kualifikueset e fundit, ftohet Messi

Futboll

Gazeta Express

28/08/2025 17:05

Kombëtarja e Argjentinës ka publikuar listën e lojtarëve për dy ndeshjet e fundit kualifikuese të Kampionatit Botëror, ndaj Venezuelës dhe Ekuadorit.

Selektori Lionel Scaloni ka vendosur të ftojë kapitenin Lionel Messi, i cili kohët e fundit kishte pësuar një lëndim, por tashmë është rikuperuar plotësisht dhe pritet të udhëheqë “Albicelestet” në fushë.

Në listë janë përfshirë gjithashtu dy nga emrat më premtues të futbollit argjentinas: Nicolas Paz, mesfushori i Comos, si dhe Franco Mastantuono i Real Madridit, të cilët shihen si pjesë e së ardhmes së kombëtares kampione bote.

Argjentina tashmë e ka siguruar pjesëmarrjen në Kupën e Botës 2026, ku do të synojë të mbrojë titullin që e fitoi në Katar në vitin 2022.

Kampionët në fuqi do të përballen fillimisht me Venezuelën më 5 shtator, ndërsa më 10 shtator do të luajnë ndaj Ekuadorit, në përfundim të ciklit kualifikues.