Dodik kërcënon me referendum në Republika Srpska: Bosnja është vetëm një iluzion, paralajmëron ‘ngrohje serioze’ drejt shkëputjes

Lajme

Gazeta Express

28/08/2025 13:30

Milorad Dodik, të cilit Komisioni Qendror Zgjedhor i Bosnjë e Hercegovinës (CIK) i ka hequr mandatin si president i Republikës Srpska (RS), në bazë të një vendimi të formës së prerë të Gjykatës së Bosnjë e Hercegovinës, ka deklaruar se referendumi i paralajmëruar për 25 tetor nuk flet në mënyrë të drejtpërdrejtë për pavarësinë, por përbën “një ngrohje serioze”.

“Republika Srpska do të pozicionohet në përputhje me të drejtën tonë për vetëvendosje”, tha Dodik në një intervistë për gazetën serbe Politika, duke dhënë një mesazh të qartë propagandues dhe kërcënues ndaj rendit kushtetues të Bosnjës.

Vendimi për referendum u mor nga shumica qeverisëse në Kuvendin e RS, dhe ai do të mbahet për të sfiduar vendimet e përfaqësuesit të lartë të bashkësisë ndërkombëtare në BeH, Christian Schmidt, si dhe për të kundërshtuar aktgjykimin e Gjykatës së BiH ndaj Dodikut dhe vendimin e CIK-ut për t’ia hequr mandatin presidencial.

Në vazhdim të retorikës së tij, Dodik theksoi se “Republika Srpska nuk ka ndërmend të tërhiqet”, duke akuzuar boshnjakët për përpjekje për ta “eliminuar nga politika”.

“Ata nuk e kuptojnë që me këtë vetëm sa forcojnë më shumë serbët. Unë jam një dëshmitar i rrezikshëm për shumëkënd. Kam qenë një ‘ngjarje e paparashikuar’ sepse arrita të ruaj RS për tridhjetë vite. Prandaj janë nervozë”, u shpreh ai.

Dodik gjithashtu sulmoi përfaqësuesin e lartë Schmidt, duke përdorur një gjuhë të ashpër dhe provokuese:

“E kuptova menjëherë kush është Schmidt, sapo filloi të bërtasë dhe të ulërijë si Hitleri në kafene”, tha ai.

“Bosnja është një iluzion që e kanë ndërtuar kundërshtarët e Trump-it. Kjo është një mesazh që duhet t’i arrijë presidentit të SHBA-së”, deklaroi Dodik.