Plantacioni me drogë në Gjilan, një muaj paraburgim për kandidatin për asamblist të VV-së dhe dy të tjerë

Lajme

Gazeta Express

26/08/2025 10:11

Gjykata Themelore në Gjilan ka aprovuar kërkesën e Prokurorisë Themelore të këtij qyteti, duke i caktuar masën e paraburgimit prej 30 ditësh, kandidatit për asamblist nga radhët e Lëvizjes Vetëvendosje në Novobërdë, Rinas Zeqirit dhe dy të tjerëve me inicialet, A.S. dhe R.A.

Më 23 gusht, rreth orës 15:00, në fshatin Vërbicë e Zhegovcit, të pandehurit pa autorizim kanë kultivuar bimën e kanabisit, në atë mënyrë që pasi që zyrtarët policor në Gjilan marrin informacion se në këtë fshat mund të ketë të mbjella bimë narkotike të llojit “Kanabis Sativa” shkojnë tek shtëpia e të pandehurit A. S., me ç’rast me rastin e kontrollit në oborrin e shtëpisë, në brendësi të serave të ndërtuara, gjejnë të kultivuara 496 bimë të këtij lloji, me gjatësi 2 metra, në këtë mënyrë të pandehurit me qëllim të prodhimit të narkotikëve, pa autorizim kanë kultivuar bimën e kanabisit.

Sipas komunikatës për media, të pandehurit në bashkëkryerje kanë kryer veprën penale kultivimi i bimës së Hashashit shkurres së kokainës ose bimëve të kanabisit, nga neni 272 paragrafi 1 dhe 31 të KPRK-së dhe të pandehurit A. S. për veprën penale mbajtja në pronësi kontoll ose posedim të paautorizuar të armëve.

“Në rastin konkret është plotësuar kushti ligjor për të pandehurin R. A., ngase në momentin kur e ka kuptuar se zyrtarët policor kanë arritur në vendngjarje, i njëjti ka tentuar të ikë, por i njëjti arrestohet, gjithashtu të njëjtit po të lihen në liri, të njëjtit do të pengojnë rrjedhën e procedurës penale duke ndikuar në njëri-tjetrin.

“Poashtu, duke marr parasysh rrethanat se ndaj të pandehurve evidentohen disa raste për vepra tjera penale, rrethanat këto të mjaftueshme për të besuar se nëse të pandehurit lihen në liri të njëjtit mund të përsërisin veprën penale. Andaj, gjyqtari i procedurës paraprake ka vlerësuar se qëndrojnë arsyet ligjore për caktimin e paraburgimit ndaj të pandehurve dhe duke i marrë për bazë të gjitha ato që u thanë më lartë, masat tjera alternative do të ishin të pamjaftueshme për zhvillimin me sukses të procedurës penale. Palët kanë të drejtën e ankesës ndaj të këtij vendimi mbi caktimin e paraburgimit në Gjykatën e Apelit”, thuhet tutje në komunikatë