Rama kritika një tjetër gjykatësi: Pengoi ekzekutimin e çlirimit të ‘tokës së xanun’

Shqiperi

Gazeta Express

22/08/2025 15:30

Kryeministri Edi Rama ka kritikuar gjykatësin Klarent Demiri, duke e akuzuar se ka penguar ekzekutimin e një vendimi për çlirimin e një hapësire publike, e cila përdorej nga një biznes privat. Rama ka shpërndarë një postim në rrjetet sociale, ku thekson se Demiri ka marrë dy vendime të tilla, duke shkelur interesin publik dhe duke penguar programet e qeverisë për zhvillimin e qyteteve dhe përmbushjen e objektivave të Shqipërisë në kuadër të integrimit në BE.

“Çfarë duhet të ketë ngrënë gjykatësi Klarent Demiri kur ka marrë vendimin për të penguar ekzekutimin e vendimit të çlirimit të kësaj “toke të xanun”?
Dhe nuk ka marrë një, po dy vendime të tilla, duke u shquar si i vetmi gjykatës deri tani që i ka rënë ndesh haptaz interesit publik, interesit të komuniteteve për çlirimin e hapësirave të tyre publike dhe zbatimit të programit të qeverisë në dobi të qyteteve e në funksion të Shqipërisë 2030 në BE
Një gjë është pak po e sigurtë:
Ne nuk do ta tolerojmë më as në heshtje, as duarlidhur asnjë përfaqësues të pushtetit të pavarur gjyqësor, që pavarësinë e tij do ta keqpërdorë për të cënuar pavarësinë e pushtetit ekzekutiv, duke penguar përmes shpërdorimit arbitrar të detyrës së vet zbatimin e programeve, projekteve apo vendimeve në interes të publikut
Edhe për gjykatës Demirin do t’i drejtohemi organeve të pavarura të qeverisjes e të kontrollit të gjyqësorit, njësoj si për prokurore Gjelin dhe për gjykatës Balliun, duke vazhduar të shpresojmë se këto organe jetike për mirëqeverisjen e gjyqësorit do të dalin nga zona e komfortit ku janë rehatuar, ndërkohë që Reforma në Drejtësi kërkon në radhë të parë përkushtimin, profesionalizmin e kurajon e tyre”, shkruan Rama në rrjete sociale.