Luis Enrique pret që Dembele të performojë edhe më mirë se sezonin e kaluar

Futboll

Gazeta Express

21/08/2025 16:31

Trajneri i Paris Saint-Germain, Luis Enrique, është i bindur se sulmuesi Ousmane Dembele mund të përmirësojë edhe më shumë paraqitjet e tij këtë sezon 2024-25, pas një viti ku udhëhoqi PSG-në drejt tripletës historike dhe u rendit mes kandidatëve kryesorë për Topin e Artë.

28-vjeçari doli nga hija e ish-yllit të PSG-së, Kylian Mbappé, dhe u shndërrua në figurë kyçe në triumfin e Ligës së Kampionëve, ndërsa vazhdoi të shkëlqejë edhe në Kupën e Botës për Klube, ku parizienët u renditën nënkampionë.

Me 35 gola dhe 16 asistime sezonin e kaluar, Dembele mbajti gjallë PSG-në edhe në Superkupën e UEFA-s javën e kaluar, duke asistuar golin e barazimit në minutën e 94-të të Gonçalo Ramos, para se portieri i ri, Lucas Chevalier, të shkëlqente me pritjet e tij në fitoren me penallti ndaj Tottenham Hotspur.

“Mendoj se ky sezon është një sfidë e madhe për Ousmane. Viti i kaluar ishte i jashtëzakonshëm, por jam i bindur se ai mund të përmirësojë edhe më shumë paraqitjet e tij, pa asnjë dyshim,” tha Luis Enrique para ndeshjes së së premtes ndaj Angersit.

“Duhet guxim për ta thënë këtë, por besoj se ai e ka nivelin. Është një lojtar shumë i rëndësishëm për ne, ka cilësi si në sulm ashtu edhe në mbrojtje. Shoh sa i lumtur është, dhe shpresoj që ky vit të jetë edhe më i mirë.”

Ndeshja e së premtes do të jetë e para e PSG-së në Parc des Princes pas tre muajsh, si dhe debutimi para tifozëve për Chevalier dhe mbrojtësin ukrainas Illia Zabarnyi.

Klubi do të prezantojë gjithashtu pesë trofetë e fituar (Ligue 1, Kupa e Francës, Liga e Kampionëve, Superkupa e Francës dhe Superkupa e UEFA-s) para publikut vendas.

“Është shumë e rëndësishme për ne të rikthehemi në Parc des Princes pas 10 ndeshjesh si mysafirë. Na ka munguar shumë stadiumi dhe tifozët. E dimë që atmosfera bën gjithmonë diferencën,” theksoi Enrique.

I pyetur nëse konflikti i vazhdueshëm mes Rusisë dhe Ukrainës ka shkaktuar probleme në dhomat e zhveshjes, duke pasur parasysh se PSG tani ka në skuadër portierin rus Matvei Safonov dhe mbrojtësin ukrainas Zabarnyi, Enrique tha se futbolli i bashkon njerëzit.

“Futbolli është mënyra më e mirë për të bashkuar njerëzit dhe për të krijuar unitet, jo ndasi,” u shpreh ai. “Sporti dhe njerëzit vijnë përpara interesave politike apo ekonomike të politikanëve.”