Policia në Skenderaj konfiskon katër armë pas një mosmarrëveshjeje pronësore

Lajme

Gazeta Express

20/08/2025 23:10

Policia e Kosovës ka njoftuar se pas një rasti të raportuar për kanosje në Skenderaj, janë konfiskuar katër armë të llojeve të ndryshme dhe disa municione.

Sipas policisë, rasti ka ndodhur si pasojë e një mosmarrëveshjeje pronësore mes dy personave. Hetuesit kanë marrë informacion se njëri nga të përfshirët dyshohej se posedonte armë, ndërsa me autorizim të prokurorit janë kryer kontrolle në disa lokacione.

Gjatë bastisjeve u gjetën dhe u sekuestruan:

1. një armë automatike AK-47 me dy karikatorë dhe 60 fishekë,
2. një pushkë gjahu dytytshe me 18 fishekë,
3. një pushkë ajrore,
4. një armë gazi e tipit pistoletë.

Po ashtu, policia ka siguruar një video-incizim ku shihet personi tjetër i përfshirë në mosmarrëveshje duke shtënë me armë.

Të dy të dyshuarit janë intervistuar, ndërsa ndaj tyre janë ngritur raste për veprat penale “Kanosje”, “Armëmbajtje pa leje” dhe “Përdorim i armës apo mjetit të rrezikshëm”. Me vendim të prokurorit, atyre u është caktuar masa e ndalimit prej 48 orësh.