Kandidaturat e Haxhiut e Gërvallës dhe shtyrja e seancës, Haradinaj: VV po përdor strategji për ta konsumuar 30 ditëshin

Lajme

Gazeta Express

20/08/2025 23:01

Seanca e parë konstituive pas aktgjykimit të Gjykatës Kushtetuese për zgjedhjen e kryeparlamentares ka përfunduar pa rezultat, pasi kandidatët e propozuar, Albulena Haxhiu dhe Donika Gërvalla, nuk arritën të sigurojnë shumicën e nevojshme.

Për pasojë, seanca është shtyrë për më 22 gusht.

Në lidhje me zhvillimet e ditës, kryetari i Aleancës për Ardhmërinë e Kosovës, Ramush Haradinaj, gjatë një interviste në emisionin Debat Plus, ka vlerësuar se qasja e Lëvizjes Vetëvendosje nuk kishte për qëllim zgjedhjen e një kandidati unifikues.

“Së pari kandidaturat, që u propozua edhe zonja Gërvalla, nuk mendoj që është qëllimi me ardh deri të një kandidat unifikues. Se po të ishte ai qëllim, do të kishim pas edhe kandidatura tjera sot. Më shumë VV-ja e paralajmëroi një strategji të konsumimit të këtij 30 ditshi. Që do të vjen kohë pas kohe me kandidatura që janë përjashtuese. Nëse dëshirojnë të arrijnë të një kandidaturë unifikuese, jemi të hapur dhe nuk ka nevojë për ta ndërpre seancën”, ka thënë Haradinaj.

Seanca e radhës pritet të vendosë nëse do të ketë një kandidat që do të marrë mbështetjen e mjaftueshme për kryesimin e Kuvendit.