Kushtetuesja e obligon Deharin të ftojë VV-në të propozojë kandidatin me votim të hapur, zgjedhja e Kryeparlamentarit brenda 30 ditëve

Lajme

Gazeta Express

18/08/2025 14:58

Gjykata Kushtetuese e ka publikuar të plotë aktgjykimin për kushtetutshmërinë për votimin e fshehtë në Kuvendin e Kosovës që e hodhi në votim për disa herë me radhë kryesuesi i seancës, Avni Dehari.

Megjithatë, Dehari nuk do të mund të këmbëngulë më me këtë pikë meqë Kushtetuesja e ka obliguar që seancën e radhës ta vazhdojë nga pika 3 e rendit të ditës së seancës konstituive, e cila u miratua me 8 prill.

Përmes kësaj, Dehari është i obliguar që ta ftojë përfaqësuesin e grupit më të madh parlamentar, Lëvizjen Vetëvendosje, për të propozuar kandidatin/en për postin e kryeparlamentarit.  

“Rrjedhimisht, Gjykata konstaton që Kryesuesi i Seancës Konstituive duhet të vazhdojë me pikën 3 të rendit të ditës së Seancës Konstituive, të miratuar më 8 prill 2025, dhe në pajtim me paragrafin 2 të nenit 67 [Zgjedhja e Kryetarit dhe Nënkryetarëve] të Kushtetutës, të ftojë përfaqësuesin e grupit më të madh parlamentar për të propozuar kandidatin/en për Kryetar/e të Kuvendit të Republikës së Kosovës, i/e cili/cila zgjedhet përmes votimit të hapur, votimi i cili mund të realizohet vetëm deri në 3 (tre) herë për kandidatin/en e njëjtë. Rrjedhimisht, Gjykata në vijim përcakton që deputetët e zgjedhur të Kuvendit duhet të zgjedhin Kryetarin/en dhe nënkryetarët e Kuvendit të Republikës së Kosovës sipas pikave 3 dhe 4 të rendit të ditës të Seancës Konstituive brenda 30 (tridhjetë) ditëve nga dita e hyrjes në fuqi të këtij Aktgjykimi”, thuhet në aktgjykimin e plotë të Kushtetueses.