Sytë e botës kah Alaska, Trump sugjeron se do të ketë këmbime territoresh, Putin i quan të sinqerta përpjekjet amerikane

Lajme

Gazeta Express

14/08/2025 21:05

Sytë e botës janë përqendruar në shtetin amerikan të Alaskës, ndërsa Presidenti amerikan Donald Trump dhe Presidenti rus Vladimir Putin përgatiten të udhëtojnë atje për samitin e tyre historik që do të zhvillohet nesër, shkruan BBC.

Udhëheqësit globalë të enjten vazhduan të negociojnë, diskutojnë dhe të mbajnë qëndrime përpara takimit.

Më parë, Kryeministri britanik Keir Starmer u takua me Presidentin ukrainas Volodymyr Zelensky në Downing Street. Ata nuk iu drejtuan së bashku mediave pas takimit të tyre njëorësh, por Zelensky tha në X se bisedimet ishin “produktive” dhe se të dy udhëheqësit diskutuan “programet mbështetëse” për ushtrinë e Ukrainës.

Një deklaratë nga Downing Street e lëshuar më vonë thotë se Putin duhet të “vërtetojë se është serioz për paqen” në samitin e nesërm.

Ndërkohë, Putin vlerësoi Trump në përgatitje, duke thënë sot se presidenti amerikan po bën përpjekje “të sinqerta” për t’i dhënë fund luftës. Udhëheqësi rus gjithashtu la të kuptohej se kontrolli i armëve bërthamore është një temë për diskutim.

Trump duket se u përpoq të minimizonte çdo zhvillim që mund të sjellë takimi i nesërm. Ai i tha Fox News Radio se ka një “shansë prej 25% që ky takim të mos jetë një takim i suksesshëm”. Nuk ka gjasa që Putini të bjerë dakord për një armëpushim nesër, tha ai, duke shtuar se do të ketë “dhënie dhe marrje” territoresh midis Rusisë dhe Ukrainës.

Dhe ai u tha gazetarëve në Zyrën Ovale pasdite se shpreson që takimi i së premtes të përqendrohet në përgatitjen e një takimi të dytë të mundshëm që përfshin Putinin, Zelenskyn dhe Trumpin dhe ndoshta udhëheqësit evropianë.

Ata udhëheqës evropianë, përfshirë Starmerin, thonë se do të ndjekin nga afër nesër.