Austri: Nuk do të ketë kompensim për dëmet në tunelin Schmitten

Lajme

Gazeta Express

11/08/2025 13:17

Salzburgu nuk do të përfitojë asnjë kompensim nga kompanitë ndërtuese lidhur me dëmet në portalin jugor të Tunelit Schmitten në Zell am See (Pinzgau). Sipas një raporti ekspertësh, afati i parashkrimit për kërkesat për kompensim ka skaduar prej kohësh, ndërsa kompania kryesore ndërtuese, Alpine, ka falimentuar, shkruan ORF, transmeton albinfo.ch.

Tuneli Schmitten, i ndërtuar midis viteve 1991 dhe 1996, ishte planifikuar të rinovohej me një vlerë prej tre milionë eurosh, pasi tavani i tij nuk ishte projektuar për t’i përballuar ngarkesat e rënda të tokës sipër tij. Sipas inxhinierëve strukturorë të pavarur, disa pjesë të tunelit nuk u ndërtuan sipas planeve origjinale, por u përdor një “version i kompanisë” që nuk plotësonte standardet e kërkuara.

Raporti ligjor i ekspertit Georg Graf nga Universiteti i Salzburgut konstaton se kompania ndërtuese Alpine dhe zyra e saj e planifikimit mbajnë përgjegjësinë për dëmin e shkaktuar. Megjithatë, shteti nuk mund të kërkojë dëmshpërblim pasi afatet ligjore për parashkrimin e pretendimeve janë tejkaluar që nga viti 1992.

Falimentimi i kompanisë Alpine në vitin 2013, me një borxh prej 2.9 miliardë eurosh, e bën edhe më të pamundur rikuperimin e ndonjë shume nga ndërtuesit. Ky falimentim konsiderohet si një nga më të mëdhenjtë në historinë ekonomike të Austrisë.

Tuneli Schmitten, i gjatë mbi pesë kilometra, është ndërtuar në disa faza dhe ka qenë projekt i veçantë nën administrimin e disa kompanive të ndryshme, që përfunduan me ASFINAG, autoritetin aktual përgjegjës për autostradat në Austri.

Shoferët që përdorin këtë tunel prej vitesh kanë shprehur shqetësime për sigurinë e tij, duke pasur parasysh dëmet dhe masat emergjente të ndërmarra për të parandaluar shembjen, si përdorimi i trungjeve të trasha për mbështetje.