Messi me dy asiste në fitoren e Inter Miamit në Kupën e Ligës

Futboll

Gazeta Express

31/07/2025 8:46

Lionel Messi dha dy asistime, përfshirë një në sekondat e fundit të ndeshjes, për ta ndihmuar Inter Miamin të mposhtë Atlasin 2-1 në ndeshjen hapëse të Leagues Cup, të mërkurën mbrëma.

Kjo ishte ndeshja e parë e Messit pasi ai dhe Jordi Alba u pezulluan me nga një ndeshje nga Major League Soccer për shkak se nuk morën pjesë në ndeshjen All-Star. Ai lidhi një pasim me Marcelo Weigandt për golin vendimtar në minutën e fundit të kohës shtesë.

Messi asistoi gjithashtu edhe për golin e Telasco Segovias, i cili hapi serinë e golave në minutën e 58-të.

Rivaldo Lozano shënoi golin e barazimit për skuadrën e Guadalajaras në minutën e 82-të, para se Weigandt të realizonte golin në minutën e 96-të, që u konfirmua nga VAR pasi fillimisht u cilësua jashtë loje.

Kjo do të thotë pesë asistime në korrik për Messin, i cili u shpall Lojtari i Muajit në Major League Soccer pasi realizoi tetë gola dhe ndihmoi Miamin të regjistrojë katër fitore, një barazim dhe një humbje në kampionat.

Mesfushori argjentinas Rodrigo De Paul bëri debutimin e tij me Inter Miamin. De Paul, shoku i kombëtares i Messit, firmosi zyrtarisht me klubin javën e kaluar.