Liverpooli nis bisedimet me yllin e Realit

Sport

Gazeta Express

22/07/2025 18:57

Ylli i Real Madridit, Rodrygo Goes, duket se është pranë një largimi këtë verë, pasi roli i tij te “Los Blancos” është zvogëluar ndjeshëm – si në Kupën e Botës për Klube, ashtu edhe në fundin e sezonit të La Ligas ku nuk mori pjesë fare. Sipas raportimeve të fundit, Liverpool është klubi favorit për të siguruar shërbimet e brazilianit.

Rodrygo më parë ishte lidhur ngushtë me një kalim te Arsenali, por pasi londinezët siguruan shërbimet e anësorit Noni Madueke nga Chelsea dhe me raportimet se tashmë kanë arritur marrëveshje me Sporting CP për sulmuesin Viktor Gyökeres, nevoja për një tjetër sulmues është zbehur. Për pasojë, burime nga Madridi raportojnë se Arsenali nuk është më destinacioni i mundshëm për Rodrygon.

Sipas gazetarit Florian Plettenberg, Liverpool po ndjek nga afër situatën e tij, sidomos nëse Luis Diaz largohet nga klubi. “The Reds” thuhet se kërkojnë rreth 80 milionë euro për kolumbianin, një shumë që Bayern Munich është gati ta ofrojë.

Nga ana tjetër, Real Madrid është i hapur për shitjen e Rodrygos – dhe këtë e ka të qartë edhe vetë lojtari – por kostoja e lartë e marrëveshjes mund të jetë një pengesë për Liverpoolin. Braziliani aktualisht përfiton 10 milionë euro në vit, një rrogë që shkon përtej strukturës aktuale të pagave te Liverpool.

Ndërkohë, gazetari Santi Aouna ka zbuluar se tashmë kanë nisur bisedimet direkte mes Liverpoolit dhe kampit të Rodrygos – përfaqësuar nga babai i tij, Eric.

Gjithashtu, raporte të mëhershme bënë të ditur se trajneri i ri i Real Madridit, Xabi Alonso, i ka bërë të qartë Rodrygos se sezoni i ardhshëm nuk do t’i ofrojë shumë minuta, gjë që e ka shtyrë edhe më afër largimit. Marrëdhëniet mes lojtarit dhe klubit janë ftohur muajt e fundit, sidomos pas deklaratave të babait të tij që shprehu pakënaqësinë për rolin e kufizuar që djali i tij kishte sezonin e kaluar./GazetaExpress/