Presidenti ukrainas konfirmon: Bisedimet e radhës me Rusinë do të mbahen në Turqi këtë të mërkurë

Lajme

Gazeta Express

22/07/2025 8:05

Presidenti ukrainas, Volodymyr Zelensky, njoftoi se bisedimet e ardhshme të paqes midis Kievit dhe Moskës do të mbahen të mërkurën në Turqi.

Dy takime të tjera midis dy palëve i kishin paraprirë kësaj në Stamboll, pa ndonjë rezultat të rëndësishëm në drejtim të përfundimit të luftës.

“Diskutova me Rustem Umerov (sekretarin e Këshillit të Sigurisë së Ukrainës) përgatitjen e një takimi të ri në Turqi me palën ruse. Umerov tha se takimi është planifikuar të zhvillohet të mërkurën”, tha Zelensky në fjalimin e tij të përditshëm.

Ai shtoi se do të japë “më shumë detaje” sot gjatë ditës.

Umerov ishte kreu i delegacionit ukrainas në dy raundet e mëparshme të bisedimeve me Rusinë.