Dronë kamikazë e raketa balistike, Rusia kreu sulmin më të madh ndonjëherë ndaj qytetit ukrainas Pavlohrad

Lajme

Gazeta Express

19/07/2025 13:43

Rusia nisi sulmin e saj më të madh ndonjëherë në qytetin lindor të Ukrainës, Pavlohrad, herët të shtunën, si pjesë e një vale të madhe sulmesh në të gjithë vendin që përfshinin qindra dronë kamikazë dhe raketa balistike.

Bombardimi gjashtorësh ishte më i keqi në historinë e qytetit. Kreu i rajonit të Dnipropetrovskit, Sergey Lysak, tha se një fabrikë ishte dëmtuar, një stacion zjarrfikësish ishte shkatërruar dhe një ndërtesë banimi pesëkatëshe ishte goditur.

“Një natë dhe mëngjes ferr për Pavlohrad. Sulmi më intensiv ndaj qytetit. Shpërthim pas shpërthimi. Terroristët rusë e shënjestruan atë me raketa dhe dronë”, tha ai.

Dronët mund të dëgjoheshin duke fluturuar mbi Pavlohrad në orët e para të së shtunës. Kishte zhurma të shpërthimeve e rrugët jehonin nga zjarri i mitralozëve, ndërsa njësitë kundërajrore përpiqeshin t’i rrëzonin, shkruan The Guardian, transmeton Gazeta Express.

Në mëngjes, tymi i zi i dendur ishte mbi qytet. Kishte disa zjarre. Një banor i rraskapitur, Oleh, tha se kishte qenë nata më e keqe që kishte përjetuar.

“Askush nuk flinte. Ne ishim të gjithë në strehimore. Pati edhe një stuhi. Patëm shpërthime dhe shi së bashku”, tha ai.

Sulmi ndodhi menjëherë pasi Gjenerali Keith Kellogg, i dërguari special i Trump në Ukrainë, u kthye në Uashington pas një vizite gjashtëditore në Kiev. Shtëpia e Bardhë njoftoi këtë javë një paketë armësh në shkallë të gjerë për Ukrainën, duke përfshirë sisteme shtesë anti-ajrore Patriot, të cilat do të paguheshin nga aleatët europianë.

Kremlini nuk kreu një bombardim në shkallë të gjerë ndërsa Kellogg ishte në vend. Mediat sociale ishin të mbushura me ‘meme’ që e përshkruanin Kellogg si një mace që mbron kryeqytetin, pasi Keith tingëllon ngjashëm me kit, ose mace në gjuhën ukrainase.

Ish-presidenti i Rusisë Dmitry Medvedev premtoi të premten se Moska do të përshkallëzonte sulmet e saj ajrore në përgjigje të paketës së fundit të sanksioneve të BE-së, e cila u ra dakord pasi qeveria pro-Kremlin në Sllovaki hoqi dorë nga kundërshtimet e saj.

Pavlohrad është një qendër strategjike për rajonin e Dnipropetrovsk. Trupat ruse janë afër kapjes së territorit në rajon, i cili kufizohet me provincën e Donetskut, për herë të parë që nga pushtimi i Vladimir Putinit në vitin 2022. Ata kanë kapur disa fshatra fqinjë ditët e fundit.