BDI: Amendamentet në Kuvend nuk i shpëtojnë nga përgjegjësia

Maqedoni

Gazeta Express

18/07/2025 13:28

Përpjekja e të përzgjedhurve shqiptarë të VMRO-s në qeveri për të shfajësuar veten për heqjen e Nenit 96 nga Ligji për Policinë është kulmi i hipokrizisë dhe shprehja më e qartë e mungesës së tyre reale në qeverisje.

Tani po premtojnë se do ta “rregullojnë me amendamente në Kuvend”, ndërkohë që kanë qenë vetë të pranishëm në mbledhjen e Qeverisë ku ky ndryshim u miratua në heshtje. Ky është një fakt i pakundërshtueshëm.

Neni 96, që garantonte përfaqësimin etnik në polici, është një detyrim kushtetues që buron nga Amendamenti 6 dhe Marrëveshja
Paqësore e Ohrit. Heqja e tij nuk është “lapsus”, është pjesë e një strategjie për të përjashtuar shqiptarët nga institucionet shtetërore, veçanërisht nga strukturat e sigurisë.

Ne jemi në Kuvend, aty ku vendosen ligjet, dhe aty do ta ndalim këtë tentativë të rrezikshme. Ju e miratuat në Qeveri, tani është vonë për të luajtur rolin e mbrojtësve të interesit publik.

Shqiptarët nuk mashtrohen më nga fasada. Nuk mjafton të jesh fizikisht i pranishëm në qeveri, nëse politikisht je inekzistent.