“Limaj në krye të Kuvendit”, Izmaku beson se marrëveshja me LVV-në do të arrihet në fundjavë

Lajme

Gazeta Express

17/07/2025 11:40

Deputetja e Nismës Socialdemokrate, Xhevahire Izmaku beson se kryetari i kësaj partie, Fatmir Limaj dhe kryetari i Lëvizjes Vetëvendosje, Albin Kurti do ta arrijnë një marrëveshje në fundjavë.

Ajo mohoi se Nisma ka hequr dortë nga kërkesa për postin e kryeparlamentarit

“Jo, absolutisht, ne jemi në atë diagonale të bisedimeve me çështjen që zoti Limaj të jetë në krye të Kuvendit dhe të presim në fundjavë që të ketë një epilog pozitiv të bisedimeve”.

Limaj, siç tha Izmaku, do të dalë “mbi egot personale dhe partiake”.

“Të shpresojmë që më në fund dikush po del mbi egot personale dhe partiake, e ky duket që do të jetë zoti Limaj pra, sepse nga fillimi e ka ndryshuar diskursin në këtë vend. Sikur të gjithë të kishim mendu nga fillimi që t’i tejkalojmë inatet dhe egot personale, besoj që sot kishim diskutu për ligje”, tha ajo.

Izmaku tha se presin që epilogu i “kafes apo drekës”, të jetë pozitiv.

“Të shpresojmë pra që kjo marrëveshje, këto bisedime që kanë shkuar me muaj të tërë ta prodhojnë një rezultat dhe Kosova të ketë institucione”.