Arratisje e pazakontë në Francë: 20-vjeçari fshihet në valixhe për të dalë nga burgu

Lajme

Gazeta Express

15/07/2025 8:05

Në Francë, një i burgosur 20-vjeçar, i dënuar për vrasje dhe pjesëmarrje në një bandë kriminale, ka arritur të arratiset nga burgu i Lyonit në një mënyrë të pazakontë. Ai u fsheh brenda valixhes së shokut të tij të qelisë, i cili u lirua atë ditë.

Ngjarja ndodhi të premten e kaluar. Shoku i qelisë kishte një karrocë për valixhen dhe e nxori pa u vënë re nga stafi i burgut, që e kuptoi mungesën e të burgosurit vetëm të nesërmen.

Arratisuri, Elyazid A., u kap tre ditë më vonë në bodrumin e një banese në veri të Lyonit. Hetimet kanë nisur për “arratisje në kuadër të një grupi të organizuar” dhe “organizatë kriminale”. Personi që e ndihmoi duke transportuar valixhen është ende në kërkim, ndërsa autoritetet franceze po shqyrtojnë masat e sigurisë dhe disiplinore në burg.