Bllokada politike e rrezikon buxhetin për 2026-ën, harrohet rishikimi i atij të vitit 2025

Lajme

Gazeta Express

12/07/2025 11:00

Ngërçi politik që ka bllokuar funksionimin e Kuvendit të Kosovës po e shtyn vendin drejt një krize buxhetore serioze. Mungesa e rishikimit të buxhetit për vitin 2025 rrezikon të lë projekte pa financim, ndërsa përgatitja për buxhetin e vitit 2026 mund të dështojë plotësisht nëse situata politike nuk zgjidhet së shpejti, raporton KosovaPress.

Në koalicionin LVV-Guxo-Alternativa akuzojnë partitë që deri tani ishin në opozitë se për shkak të qasjes bllokuese të tyre, vendi po humb në aspektin ekonomik. 

Nëse situata politike nuk zhbllokohet së shpejti, disa nga projektet kryesore të infrastrukturës, subvencionet, investimet kapitale dhe pagesat ndaj sektorit publik mund të vonohen ose ndërpriten, duke prekur kështu drejtpërdrejt jetën e qytetarëve dhe zhvillimin ekonomik të vendit.

Rishikimi i buxhetit për vitin 2025 tashmë është i paraparë që të ndodh ose të ndodhte në raport me miratimin e buxheteve të tri komunave të cilat nuk e kanë miratuar buxhetin me kohë, si Komuna e Prishtinës, Komuna e Gjilanit dhe Komuna e Zveçanit. Ndërsa, agjencitë buxhetore janë bllokuar përballë kërkesave të reja buxhetore, të cilat kërkojnë rishikim formal për t’u realizuar.

Lidhur me këtë situatë buxhetore, KosovaPress ka kontaktuar edhe Ministrinë e Financave, Punës dhe Transfereve, por deri më tani nuk ka marrë përgjigje.

Kryetarja e partisë Alternativa njëkohësisht deputete nga radhët e Lëvizjes Vetëvendosje, Mimoza Kusari Lila thotë për KosovaPress se sa i përket kërkesave të reja buxhetore, ato  duhet të trajtohen dhe është në proces nga Ministria e Financave.

Por, sipas Kusarit-Lila,  natyrshëm që mund të ketë kërkesa nga agjencitë buxhetore apo shtim të mjeteve për pozicione të caktuara, por që domosdoshmërisht duhet të kalojnë përmes rishikimit të  buxhetit.

Ajo shton se në cilindo rast, shtyrja e mëtutjeshme e konstituimittë Kuvendit mund të sjell pasoja edhe miratimin me kohë të buxhetit për vitin 2026.

Në anën tjetër deputeti nga Partia Demokratike e Kosovës, Ferat Shala thotë se pasojat e moskonstituimit të Kuvendit tashmë janë të dukshme dhe se shteti po humb kohë kritike për rialokimin e fondeve dhe miratimin e projekteve.

Ndërsa, eksperti për ekonomi, Lekë Musa paralajmëron se vonesat në rishikim e miratim buxhetor po i  dëmtojnë rëndë investimet, infrastrukturën dhe sektorin privat.

Ai tha se implementimi i buxhetit 2025, është në vonesë për disbursimin e fondeve për shërbime publike, subvencione dhe investimet në infrastrukturë. 

Në nëntor të vitit 2024, Kuvendi i Kosovës pati miratuar projektbuxhetin prej 3.6 miliardë eurosh për vitin 2025. Ndërsa, buxheti për vitin 2024 ka qenë në vlerë 3 miliardë e 314 milionë euro.

Qeveria e Kosovës është e obliguar të bëjë rishikimin e Ligjit të Buxhetit për çdo vit, por deri më tani mbetet ende paqartë nëse do të ndodh një gjë e tillë për vitin 2025, për faktin se tashmë Qeveria është në detyrë. Kosova mbajti zgjedhje nacionale më 9 shkurt, dhe që nga ajo kohë nuk pati konstituim të Kuvendi e as formim të qeverisë në detyrë. Për herë të 45-të ka dëshruar të premten të konstituohet legjislatura e nëntë e Kuvendit të Kosovës.