Shtatë zjarre aktive, dy të lokalizuara, QMK: Janë regjistruar 31 zjarre në hapësirë ​​të hapur

Maqedoni

Gazeta Express

09/07/2025 11:44

Deri në ora 7 e mëngjesit të sotëm, në vend janë regjistruar gjithsej 31 zjarre, shtatë prej të cilave janë aktive, sipas Qendrës për Menaxhimin e Krizave (QMK). Dy zjarre janë lokalizuar, dhe 22 janë shuar, transmeton Portalb.mk.  

Nga QMK thonë se ka dy zjarre aktive në Komunën e Makedonski Brod. Njëri është midis fshatrave Creshnevo, Lokvica dhe Slatin. Zjarri i dytë është në fshatin Samokov.  

Zjarri në Komunën e Çuçer Sandevo, midis fshatrave Bllacë dhe Çuçer është ende aktiv. Sipas informacioneve nga QMK, pyll me rritje të ulët po digjet pranë fshatit Nikoliç në Komunën e Dojranit. 

Zjarre aktive ka edhe në Komunat Butel dhe Kavadar, pranë fshatrave Ljubin dhe Krushevicë, ku po digjet bimësi e ulët. 

QMK njoftoi se një zjarr është aktiv edhe në Komunën e Çashkës, poshtë Sollunska Gllavës. 

Kujtojmë se për shkak të rritjes së shfaqjes së zjarreve, Qeveria dje miratoi një vendim në një seancë me të cilin shpalli gjendje krize në të gjithë territorin e vendit për një periudhë prej 30 ditësh. 

Ky vendim mundëson veprim të koordinuar nga të gjitha institucionet kompetente – ushtria, policia, zjarrfikësit, Qendra për Menaxhimin e Krizave (QMK), Drejtoria për Mbrojtje dhe Shpëtim (DMSH) dhe pushtetet lokale. 

Në RMV është ndaluar lëvizja në pyje që nga 1 korriku e deri në fund të gushtit.

Maqedonia e Veriut këto ditë po përballe me zjarre masive të pakontrolluara. Drejtori i Drejtorisë për Mbrojtje dhe Shpëtim (DMSH), Stojançe Angellov, ka paralajmëruar punësimin e 400 zjarrfikësve të përkohshëm. Deri më tani, për shkak zjarrit ka ndërruar jetë një person në Gjorçe Petrov, ndërsa ka pasur edhe bllokim të kufirit në Bllacë.