Agjencia e Menaxhimit Emergjent bën thirrje për kujdes me zjarre: Përballeni me ndjekje penale

Lajme

Gazeta Express

05/07/2025 13:40

Agjencia e Menaxhimit Emergjent iu ka bërë thirrje të gjithë qytetarëve të Republikës së Kosovës që të tregojnë kujdes të shtuar gjatë stinës së verës, e cila karakterizohet me temperatura të larta dhe rrezik të shtuar për zjarre.

Në apelin e publikuar nga Ministria e Brendshme thuhet se zjarret në pyje, fusha dhe hapësira të hapura shkaktojnë dëme të mëdha materiale, ndotin ajrin, shkatërrojnë natyrën dhe rrezikojnë jetën dhe sigurinë e qytetarëve.

MPB rikujton se zjarrvëniet janë vepër penale.

“Vlen të theksohet dhe t’iu bëhet e ditur se zjarrvëniet e qëllimta, si dhe ato të shkaktuara nga pakujdesia, janë vepra penale të cilat sanksionohen me ligj. Çdo person që shkakton zjarr, duke dëmtuar pronën publike apo private, ose duke rrezikuar jetën e qytetarëve dhe mjedisin, përballet me ndjekje penale dhe masa ndëshkuese sipas legjislacionit në fuqi”.

Po ashtu, kjo agjenci ka vënë në dispozicion numrat kontaktues ku qytetarët mund të raportojnë raste të dyshimta.