SPAK kërkon dënime të ashpra për të akuzuarit në dosjen “Metamorfoza”

Shqiperi

Gazeta Express

26/06/2025 10:41

Prokuroria e Posaçme kundër Krimit të Organizuar dhe Korrupsionit (SPAK) ka shpallur pretencën për disa të akuzuar të rëndësishëm në dosjen e njohur si “Metamorfoza”. Sipas kërkesave të SPAK, Behar Bajri duhet të vuajë një dënim prej 15 vitesh burg, ndërsa Pëllumb Gjoka ka kërkuar 14 vite heqje lirie.

Për të akuzuarit e tjerë, SPAK kërkon:

• Edmond Preka: 11 vite burg,
• Astmer Bilali: 10 vite burg,
• Ardit Hasanbegaj: 9 vite burg,
• Xhevahir Lita: 6 vite burg,
• Oltion Bistri: 9 vite burg.

Kërkesat për dënime janë të lidhura me akuzat për vrasje, sigurim armësh dhe mjete për atentate, si dhe për disa veprime të tjera kriminale që përfshijnë korrupsionin dhe zbulimin e sekreteve hetimore. Të gjithë të pandehurit do të mund të përfitojnë nga ulja e dënimit për një të tretën, për shkak të pranimit të gjykimit të shkurtuar.

Dosja ka të bëjë me një seri aktivitetesh kriminale të lidhura me grupe të strukturuara, të cilat përfshijnë edhe porosi për vrasje përmes përdorimit të aplikacionit të njohur “Sky”. Përveç akuzave për vrasje dhe atentate, disa të pandehur janë akuzuar edhe për falsifikim dokumentesh dhe tjetërsim të pasurive, ndërsa një ish-shef i Operacionales, Oltion Bistri, është nën hetim për korrupsion dhe për përfshirje në prishjen e provave.

Në tetor të vitit të kaluar, Gjykata e Posaçme ka vendosur sekuestro ndaj 39 hektarëve tokë, të cilat dyshohet se janë fituar në mënyrë të paligjshme nga Pëllumb Gjoka, i arrestuar në korrik të vitit 2023. Tokat, të cilat janë regjistruar në emër të një shoqërie tregtare dhe të një të afërmi të tij, janë të dyshuara për tjetërsim të paligjshëm përmes falsifikimeve.