Salca pikante di të shkaktojë një sulm në zemër

Ushqimi/Dieta

Gazeta Express

25/06/2025 22:25

Ekspertët kanë paralajmëruar për rreziqet vdekjeprurëse të konsumimit të ushqimeve tepër pikante, duke thënë se për njerëzit me rrezik të lartë, specat djegës veprojnë si “një bombë në stomak”.

Përbërësit në disa bimë speci mund të shkaktojnë ngushtim të enëve të gjakut, duke rritur ndjeshëm tensionin dhe rrahjet e zemrës, çka rrit rrezikun për sulm në zemër.

Sipas Dr. Allan Capin, mjek i kujdesit urgjent në Cleveland Clinic, ky është një rrezik i veçantë për njerëzit me zemër të zgjeruar dhe defekte të lindura në zemër.

Paralajmërimi i Dr. Capin vjen pasi u shfaq një video virale ku një i ri u rrëzua pas vetëm një kafshimi të “karrit më të djegshëm në botë”.

Videoja, e cila është parë mbi gjashtë milionë herë në X, tregon një burrë – i identifikuar vetëm si Daniel – që largohet me nxitim nga restoranti The Bengal Village në Londrën Lindore, menjëherë pasi provoi pjatën.

Pronari i restorantit, z. Raj, shihet duke i thënë Danielit se do të rikuperohet shpejt, duke e këshilluar të pijë një mango lassi.

Rreziqet potenciale për shëndetin nga konsumimi i specave tepër djegës vijnë nga nivelet e larta të capsaicin, përbërësi që i jep nxehtësinë.

Ndërsa ekspertët theksojnë se është e rrallë të vdesësh nga nivelet e larta të capsaicin-it, nuk është e pamundur.

Videoja më e fundit doli në pah dy vjet pas vdekjes tronditëse të adoleshentit nga Massachusetts, Harris Wolobah, 14 vjeç.

Ai pësoi një atak fatal në zemër në shtator 2023, pasi hëngri një patatinë të ashtuquajtur si më e djegshmja në botë, si pjesë e një sfide në rrjetet sociale.

Një autopsi tregoi se studenti kishte një gjendje të fshehtë të zemrës, e cila u përkeqësua nga doza e madhe e capsaicin-it.

Dr. James Udelson, shefi i kardiologjisë në Tufts Medical Center, tha më parë se një “stimulim i rëndësishëm i zemrës,” për shembull nga konsumimi i ushqimeve shumë pikante, mund të shkaktojë qarkullim jonormal të gjakut dhe ritme të parregullta të zemrës.

“Ka pasur raportime për toksicitet akut nga capsaicini që shkakton ishemi (rrjedhje jonormale të gjakut) të muskujve të zemrës”, shtoi ai.

Megjithatë, shkencëtarët nuk janë të sigurt se sa capsaicin është e mjaftueshme për të shkaktuar një reagim fatal, pasi kjo ndryshon nga individi në individ.

Ushqimet dhe përbërësit pikant zakonisht renditen sipas asaj që quhet Shkalla Scoville.

Për shembull, ‘Pepper X’ – speca më i djegshëm në botë – ka afro 2.7 milionë njësi në këtë shkallë. Ndërsa jalapeno i zakonshëm ka vetëm rreth 5,000 njësi.

Ekspertët thonë se nuk ka një pikë të caktuar në Shkallën Scoville ku konsumimi bëhet i rrezikshëm.

Megjithatë, në përgjithësi, sa më lart të shkojë një produkt në këtë shkallë, aq më të forta janë efektet anësore – si urthi, problemet me tretjen dhe çrregullimet e zemrës potencialisht fatale.

Ka raste të dokumentuara ku njerëzit janë shtruar në spital – për shembull, një burrë që kishte ngrënë të paktën katër speca që vlerësoheshin rreth një milion njësi Scoville.

Ekspertët në përgjithësi këshillojnë të shmangen salcat pikante që promovohen si “më të djegshmet në botë”.

Disa nga salcat më të theksuara për rrezikshmëri janë:

The Last Dab Xperience

The End: Flatline

(të dyja të disponueshme në Amazon)

Më shumë se 90 për qind e përbërësve të The Last Dab Xperience përfshijnë Pepper X të tharë, të freskët ose të distiluar.

Ndërkohë, The End: Flatline paraqet një EKG të drejtë (flatline) në etiketë – një sinjal që tregon ndalimin e rrahjeve të zemrës.

Përshkrimi i saj thotë: “Ky është një paralajmërim, dhe një paralajmërim i vërtetë – jo si disa nga paralajmërimet tona qesharake në salcat e tjera. Kjo është salca jonë më e nxehtë ndonjëherë.”

Ekspertët kanë paralajmëruar edhe më parë për ushqimet tepër pikante, sidomos pasi njerëzit kanë postuar video në TikTok duke ngrënë speca ekstremisht djegës.

Një video nga @Ramizeinn, me 16.3 milionë ndjekës, e tregon atë duke ngrënë disa ghost chillies, para se të pijë një kuti qumështi dhe të duket qartësisht në dhimbje.

Në një video tjetër, nga @peteypappi (658,000 ndjekës), dy persona tentojnë të hanë speca shumë djegës, por heqin dorë në mes të sfidës.

Dr. Duane Mellor, dietolog në Universitetin Aston në Birmingham, paralajmëroi se konsumimi i këtyre specave mund të shkaktojë probleme me tretjen dhe, në raste ekstreme, të rrisë rrezikun për kancer.

Kjo sepse ushqimet pikante dihet se shkaktojnë refluks acidi – kur acidi i stomakut ngjitet drejt fytit.

“Nëse kjo vazhdon për një kohë të gjatë, mund të shkaktojë ndryshime në ezofag dhe të rrisë rrezikun për kancer,” tha Dr. Mellor.

Ky ishte edhe përfundimi i një studimi të vitit 2022, i cili zbuloi se konsumimi i lartë i ushqimeve pikante mund të rrisë rrezikun për kancer ezofageal. /GazetaExpress/