Izraeli vret një tjetër shkencëtar të lartë bërthamor i Iranit

Lajme

Gazeta Express

24/06/2025 12:33

Mediat shtetërore iraniane kanë identifikuar një tjetër shkencëtar të lartë bërthamor, që sipas tyre është vrarë në sulmet izraelite, shkruan CNN.

Mohammad Reza Seddighi Saber, i cili punonte në programin e armëve bërthamore të Iranit, u “vra” në sulmet më të fundit izraelite në veri të kryeqytetit, Teheran, raportoi të martën Press TV.

Izraeli pretendon se ka vrarë disa shkencëtarë bërthamorë iranianë me profil të lartë gjatë 12 ditëve të fundit, ndërsa ka ndërmarrë sulme të gjera që synojnë programin e armëve bërthamore të vendit, rangjet më të larta ushtarake dhe bazat raketore.

Sipas një raporti të së hënës nga Këshilli për Marrëdhënie me Jashtë, të paktën 10 shkencëtarë iranianë janë vrarë në këto sulme deri atëherë, përfshirë Fereydoon Abbasi, ish-drejtuesin e Organizatës për Energjinë Atomike të Iranit, dhe Amir Hossein Feqhi, ish-zëvendësdrejtorin e kësaj organizate.

Seddighi Saber ishte në mesin e disa personave që u sanksionuan më herët këtë vit nga Departamenti i Shtetit dhe Thesari i SHBA-së për lidhjet e tyre me programin bërthamor të Iranit.

Sipas Departamentit të Shtetit, ai ishte kreu i një grupi që punon për projekte të lidhura me eksplozivët në SPND, organizata iraniane për mbrojtje, inovacion dhe kërkim. Projektet e grupit përfshinin kërkime dhe testime të aplikueshme për zhvillimin e pajisjeve shpërthyese bërthamore, tha Departamenti i Shtetit.

Zyra e kryeministrit izraelit Benjamin Netanyahu konfirmoi të martën se Forcat e Mbrojtjes së Izraelit (IDF) kishin vrarë një tjetër shkencëtar bërthamor iranian, pa përmendur emrin e Seddighi Saber.

“Gjatë 24 orëve të fundit, IDF ka goditur objektiva kryesore të regjimit në zemër të Teheranit, ka eliminuar qindra operativë të Basij – forca e shtypjes së brendshme të regjimit – dhe ka vrarë një tjetër shkencëtar të lartë bërthamor”, tha zyra e Netanyahut në një deklaratë.