‘Kjo do ta destabilizonte të gjithë situatën’ – Rusia i thotë SHBA-së të mos ndërhyjë në Iran

Lajme

Gazeta Express

19/06/2025 14:10

Ndërhyrja e Amerikës në konfliktin mes Izraelit dhe Iranit do të çonte në “një tjetër spirale të tmerrshme përshkallëzimi”, i ka thënë zëdhënësi i Kremlinit, Dmitry Peskov, agjencisë shtetërore ruse të lajmeve TASS.

SHBA dhe Rusia po mbështesin palë të ndryshme në këtë konflikt, shkruan BBC.

Ndërsa Donald Trump po kërkon një “dorëzim të pakushtëzuar” nga Irani dhe thuhet se po shqyrton mundësinë e sulmeve kundër tij, Moska e sheh Teheranin si një aleat kyç.

Më herët këtë vit, Vladimir Putin nënshkroi një traktat gjithëpërfshirës partneriteti strategjik me homologun e tij iranian, Masoud Pezeshkian, neni i parë i të cilit shprehet se ata janë të gatshëm të zhvillojnë bashkëpunim në fushën e mbrojtjes dhe sigurisë.

Irani gjithashtu e ka furnizuar Moskën me dronë Shahed që kanë luajtur një rol kyç në luftën e Rusisë kundër Ukrainës.

Ministria e Jashtme ruse i ka dënuar sulmet e Izraelit si “cinike” dhe “të paprovokuara”, dhe vetëm dje zëvendësministri i Jashtëm rus, Sergei Ryabkov, paralajmëroi SHBA-në të mos i japë ndihmë ushtarake Izraelit.

“Kjo do ta destabilizonte në mënyrë dramatike të gjithë situatën”, tha ai.

E gjithë kjo e vendos Moskën dhe Washingtonin në një kurs përplasjeje për krizën Izrael-Iran, dhe mund të rezultojë një pengesë madhore në marrëdhënien Rusi-SHBA që ka qenë në përmirësim që nga rizgjedhja e Donald Trump.