Rusia hap një shoqatë historike ruse në Beograd, kryetar zgjidhet i sanksionuari i Amerikës Aleksandar Vulin

Lajme

Gazeta Express

12/06/2025 12:04

Serbia dhe Rusia kanë bërë edhe një hap të ri që vë në pah lidhjet e ngushta që këto dy vende kanë me njëra-tjetrën.

Këtë herë Rusia ka zgjedhur që pikërisht në Serbi të hap një përfaqësi te re të saj në Beograd.

Bëhet fjalë për Shoqatën Historike Ruse, e udhëhequr nga Sergej Narishkin, drejtori i Shërbimit të Inteligjencës së Jashtme të Federatës Ruse.

Vendimi është marrë në seancën e Asamblesë së Shoqatës, të mbajtur në Moskë.

Siç raportohet, përfaqësia do të ketë në krye Aleksandar Vulin, i cili është emëruar njëzëri nga Asambleja si kryetar i Këshillit të përfaqësisë së Shoqatës Historike Ruse në Serbi, raporton Danas.

Aleksandar Vulin është një figurë kontroverse në politikën rajonale dhe ndërkombëtare. Në vitin 2023, Shtetet e Bashkuara të Amerikës e vendosën atë në listën e sanksioneve për shkak të lidhjeve të tij me Rusinë, por edhe për akuza për korrupsion dhe minimin e institucioneve demokratike në Serbi.

Sipas Departamentit Amerikan të Thesarit, Vulin ka përdorur pozitat e tij zyrtare për të përkrahur agjenda të Kremlinit dhe për të ndihmuar rrjete kriminale.

Raportohet se dy vendet planifikojnë të organizojnë së shpejti Forumin e parë të Rektorëve të universiteteve ruse dhe serbe. Po ashtu, po shqyrtohet ideja për krijimin e një Shoqate Ruso-Serbe të Universiteteve  nën petkun e ‘thellimit të bashkëpunimit akademik dhe kulturor mes dy vendeve, në një kohë kur marrëdhëniet me Perëndimin janë të tensionuara’.