Bislimi ka pranuar që ta takojë në Bruksel Petkoviqin, por kryenegociatori serb vonohet

Lajme

Gazeta Express

02/06/2025 17:23

Zëvendëskryeministri në detyrë i Kosovës, Besnik Bislimi ka pranuar të takohet me kryenegociatorin serb për dialogun, Petar Petkoviq, por tha se delegacioni serb u vonua për të mbërritur në Bruksel.

Bislimi i tha Koha.net pas takimit me të dërguarin e Bashkimit Europian për dialogun Kosovë-Serbi, Peter Sorensen se ishte paraparë që sot të mbahej edhe një takim trelateral, që nuk ndodhi.

Tha se në takimin me ndërmjetësin e BE-së ka diskutuar “një sërë temash”.

“Ka qenë i paraparë edhe një takim trelateral, por nuk ka mundur të ndodhë për shkak se kanë ndodhur komplikime me ekipin e Serbisë, i cili nuk ka arritur në Bruksel për shkak të vonesave”, tha ai.

Bislimi tha se e ka njoftuar Petersenin për qasjen që do ta ketë pala kosovare në fazat e ardhshme të bisedimeve.

“Në takim bilateral ngritëm një sërë temash për të cilat mendojmë se është shumë me rëndësi që të kemi përgjigje nga Brukseli, apo zgjidhje, p.sh. kemi rastin e menaxhimit të integruar të kufirit ku ka ngecje të mëdha nga ana e Serbisë, si në përmbushjen e obligimeve të tyre p.sh. në tri pikat kufitare që është dashur t’i ndërtojnë ose në përgjigje ndaj propozimeve tona që Bujanoc e Breznicë të hapen pika sezonale gjatë kohës kur ka udhëtarë që kthehen nga diaspora, por edhe problemet që kemi me njohjen e certifikatave. Diskutuam edhe për një proces shumë të rëndësishëm që e kemi – mbështetjen e shqiptarëve në Luginën e Preshevës përmes ndihmave për fermerët e vegjël. I ka bllokuar Serbia në llogaritë bankare të Këshillit Kombëtar Shqiptar, kërkuam sa më shpejt çbllokimin e këtyre mjeteve, folëm edhe për fushatën dezinformuese që Serbia e ka nisur në shumë fronte me qëllim të dezinformomit të partnerëve ndërkombëtarë, por edhe mbajtjes lart të presioneve te qytetarët serbë në Kosovë dhe tema të tjera të ngjashme”, tha ai.