KDI pas takimit me Nismën: Hapi i parë, ditët në vijim takime të tjera për të kërkuar zgjidhje në funksion të stabilitetit institucional

Lajme

Gazeta Express

02/06/2025 16:53

Instituti Demokratik i Kosovës e cilësoi si “hap të parë derejt hapjes së dialogut ndërmjet spektrit politik dhe shoqërisë civile” takimin që e patën sot me Nismën Socialdemokrate.

“Takimi i sotëm me përfaqësues të Nismës Socialdemokrate shënoi një hap të parë drejt hapjes së dialogut ndërmjet spektrit politik dhe shoqërisë civile për tejkalimin e ngërçit institucional që ka paralizuar punën e Kuvendit të Republikës së Kosovës”, tha KDI në një njoftim.

Nga perspektiva e shoqërisë civile, KDI tha se “mbajtja peng e institucioneve për shkak të mosmarrëveshjeve politike është e papranueshme dhe dëmton drejtpërdrejt interesin publik, funksionimin demokratik dhe kredibilitetin e shtetit”.

“Në këtë takim, theksuam nevojën që konsensusi politik të ndërtohet mbi transparencë, përfshirje dhe përgjegjësi – jo vetëm për të zhbllokuar institucionet, por edhe për të rikthyer besimin e qytetarëve në proceset demokratike”, thuhet në njoftim.

Ky, IKD tha se “ishte vetëm hapi i parë”. Për në ditët në vijim, u tha se “do të pasojnë takime të tjera me synimin për të thelluar diskutimet dhe për të kërkuar zgjidhje të qëndrueshme në funksion të stabilitetit institucional dhe të ardhmes demokratike të vendit”.