Bajrami: Afera më e madhe korruptive në Kosovë po ndodh në sektorin e energjisë, Prokuroria të veprojë urgjentisht

Lajme

Gazeta Express

26/05/2025 12:39

Deputetja e LDK-së, Hykmete Bajrami, ka thënë se aktualisht në Kosovë, nuk ka korrupsion më të madh se ai në energji.

Bajrami ka bërë thirrje të hetohet çdo gjë nga Prokuroria.

“Duhet të hetohet KEK-u: Pse remontet bëhen dimrit? A është prodhuar më shumë verës e natën kur nuk kemi konsum dhe më pak ditën duke ndikuar në rritjen e importit? Të hetohen tenderët dhe ndikimi i realizimit të tyre në kapacitetet gjeneruese dhe rritjen e importit?”

Sipas saj, duhet të hetohet Qeveria/Ministria e Ekonomisë dhe ndërhyrjet politike në KEK, ZRrE dhe KOSTT.

“Duhet të hetohet KOSTT-i: Si është e mundur që çmimet në ALPEX janë më të shtrenjta sesa në HUPX gjatë tërë vitit 2024 dhe gjatë viti 2025? Si është lejuar të kalojë importi i energjisë me çmim transporti deri në 800 euro për MWh?”

Ajo thotë se pos këtyre të dyjave, duhet të hetohet ZRrE-ja, sepse sipas saj, kjo licencon KEK-un, KOSTT-in dhe të gjithë operatorët privatë.

“Duhet të hetohet NOA si tregtari më i madh i energjisë dhe lidhjet e kësaj kompanie me Serbi e me këdo në Kosovë si dhe kompanitë dhe palët e tjera përfituese në krejt këtë situatë”.

Kushdo që e zbardh këtë skemë, sipas Bajramit, do të hyjë në historinë e këtij shteti si patrioti më i madh i pasluftës.

“Përndryshe, nëse ky skandal i përmasave të Ëatergate heshtet dijeni të gjithë se do të shkatërrojë ekonominë e këtij vendi dhe do ta varfërojë çdo familje në Kosovë. Mos harroni, në Kosovë janë mbi 700 mijë njehsorë/matës të energjisë – një euro më shumë në muaj për secilin, llogaritni sa kushton, por rritja prej 128% sa mendoni se është? E rritja deri në 260% për 1300 biznese – sa?”

Ajo thotë se krejt këto kanë çmimin e të ardhmes së këtij vendi – nuk guxojmë me u bë peng i këtyre përfitueseve, andaj na duhet reagim!

“Një shtet dhe një shoqëri nuk mund të dorëzohen para veprës më të madhe korruptive që po ndodh në historinë e vendit tonë. Falënderoj gazetarët që kanë shpërfaqë fakte shokuese dhe na i kanë hapë sytë me gisht siç thotë populli, për me pa se çka po ndodhë në sektor”.