Kryeministri britanik thotë se “niveli i vuajtjes” në Gaza është “krejtësisht i patolerueshëm”.

Lajme

Gazeta Express

20/05/2025 14:31

Kryeministri i Mbretërisë së Bashkuar, Keir Starmer, tha se bombardimi i fëmijëve në Gaza është i patolerueshëm dhe kërkoi rritjen masive të ndihmave humanitare.

“Së pari do të doja të them diçka për situatën e tmerrshme në Gaza, ku niveli i vuajtjeve, i bombardimeve përsëri të fëmijëve të pafajshëm, është krejtësisht i patolerueshëm”, tha ai në Dhomën e Ulët të Parlamentit britanik, shkruan The Guardian, transmeton Gazeta Express.

“Jemi të tmerruar nga përshkallëzimi nga Izraeli. Ne përsërisim kërkesën tonë për armëpushim si e vetmja mënyrë për të liruar pengjet. Ne përsërisim kundërshtimin tonë ndaj vendbanimeve në Bregun Perëndimor dhe përsërisim kërkesën tonë për të rritur masivisht ndihmën humanitare në Gaza”.

Starmer tha se njoftimi i kohëve të fundit se Izraeli do të lejojë një “sasi bazë ushqimi” në Gaza është i papranueshëm sepse kjo sasi është krejtësisht e pamjaftueshme.

“Kështu që ne duhet të koordinojmë reagimin tonë sepse kjo luftë ka vazhduar për një kohë të gjatë”. Ne nuk mund të lejojmë që populli i Gazës të vdesë nga uria dhe sekretari i jashtëm [David Lammy] do të vijë së shpejti për të paraqitur përgjigjen tonë në detaje”, tha ai.