Arsim Jashari në “Favorit”: “Ballkani ka ecë nëpër fushë ndaj Llapit, interesimi për fitore ka qenë zero”

Futboll

Gazeta Express

18/05/2025 22:50

Ish-futbollisti dhe tani juristi, Arsim Jashari, ka ngritur pikëpyetje serioze rreth përkushtimit të skuadrës së Ballkanit në ndeshjen e fundit ndaj Llapit, e cila është zhvilluar në kuadër të Superligës së Kosovës.

I ftuar në emisionin sportiv “Favorit”, Jashari komentoi me tone të drejtpërdrejta performancën e kampionëve aktualë, duke sugjeruar se mungesa e angazhimit në këtë përballje ishte e dukshme dhe shqetësuese.

“Për mendimin tim, Ballkani ka ecë nëpër fushë në ndeshjen ndaj Llapit. Interesimi për me fitu aty ka qenë zero,” u shpreh Jashari, duke nënvizuar se qëndrimi i skuadrës në atë takim ka lënë shumë për të dëshiruar.

Ai shtoi më tej se vlerësimi i tij nuk bazohet vetëm në perceptimin personal, por edhe në diskutimet që po qarkullojnë në opinionin sportiv.
“Po flas atë që kam parë dhe çfarë po flitet.”

Deklaratat e Jasharit vijnë në një moment të ndjeshëm të kampionatit, kur çdo pikë është vendimtare në garën për titull dhe për mbijetesë.