Agjencia për Parandalimin e Korrupsionit po përgatit kallëzime penale për 29 zyrtarë publikë që nuk kanë deklaruar pasurinë

Lajme

Gazeta Express

15/05/2025 7:27

Agjencia për Parandalimin e Korrupsionit (APK) ka njoftuar se është duke përgatitur kallëzime penale për 29 zyrtarë publikë që nuk kanë bërë deklarimin vjetor të pasurisë.

Afati ligjor për zyrtarët publikë që ta bëjnë deklarimin e pasurisë është nga data 1 deri më 31 mars të secilit vit.

Në një përgjigje për KALLXO.com, APK ka thënë se në total janë 141 zyrtarë publikë që nuk kanë kryer deklarimin me kohë.

“Ndërsa nga numri i përgjithshëm 141, deri tani, pasi verifikimet po vazhdojnë, janë 29 zyrtarë që rezultojnë se nuk kanë përmbushur detyrimin as brenda afatit shtesë prej 15 ditësh dhe kështu ndaj tyre përveç shqiptimit të gjobës, Agjencia është duke përgatitur kallëzime penale të cilat do t’i dorëzojë në prokuroritë përkatëse” – kanë thënë nga APK.

Sipas Ligjit, nëse një zyrtar publik nuk bën deklarimin e pasurisë brenda afatit ligjor, Agjencia për Parandalimin e Korrupsionit shqipton gjobë ndaj tij në shumën prej 30% të pagës. Më pas, zyrtari publik ka afat shtesë prej 15 ditëve pas shqiptimit të gjobës ndaj tij, që të bëjë deklarimin e pasurisë.

Nëse as pas afatit shtesë prej 15 ditëve nuk bën deklarimin, APK dorëzon kallëzim penal ndaj tij.

Më 07.05.2025 KALLXO.com ka raportuar se Hasan Krasniqi, kryeshef i Kompanisë Rajonale të Ujësjellësit “Gjakova”, nuk ka bërë deklarimin vjetor të pasurisë brenda afatit ligjor në Agjencinë për Parandalimin e Korrupsionit (APK).

Këtë për KALLXO.com e kishte konfirmuar APK-ja, e cila kishte bërë të ditur se ndaj Krasniqit ka filluar shqyrtimi i rastit për mosdeklarim të pasurisë brenda afatit.

Hasan Krasniqi është duke u hetuar për korrupsion nga Prokuroria Speciale në lidhje me dy tenderë të KRU “Gjakova” pas raportimeve që kishte bërë KALLXO.com. Ai ka qenë në paraburgim nga data 17.03.2025 deri më 18.04.2025.