Arrestohet një person në Prishtinë, dyshohet për keqpërdorim të mbi 100 mijë eurove në një çerdhe

Lajme

Gazeta Express

14/05/2025 22:37

Policia e Kosovës ka zbuluar një rast të rëndë të dyshuar për keqpërdorim të fondeve publike në një institucion parashkollor në kryeqytet. Hetimet, të udhëhequra nga Njësia Rajonale për Hetimin e Krimeve Ekonomike dhe Korrupsionit, kanë sjellë në dritë të dhëna shqetësuese për mashtrime me subvencione publike dhe abuzim me pasurinë shtetërore.

Sipas Policisë, gjatë hetimeve janë siguruar prova që tregojnë përpilimin e listave fiktive të fëmijëve që supozohej se frekuentonin institucionin, kur në fakt nuk ishin të pranishëm në asnjë moment. Me këtë veprim, dyshohet se janë përfituar në mënyrë të kundërligjshme mjete financiare të konsiderueshme nga buxheti publik.

Për më tepër, hetimet kanë zbuluar tërheqje të parregullta të parave si dhe blerje të pajisjeve elektronike pa ndonjë arsyetim të bazuar në nevojat institucionale. Sipas vlerësimeve të para, dëmi i shkaktuar mund të arrijë shifrën prej mbi 100 mijë euro.

Policia ka intervistuar dy persona të dyshuar në lidhje me rastin, ndërsa njëri prej tyre është ndaluar dhe është dërguar në mbajtje për procedura të mëtejme ligjore.