Gjendja shëndetësore Bidenit më serioze se sa u paraqit publikisht, zbulon një libër i ri

Lajme

Gazeta Express

14/05/2025 7:28

Gjendja shëndetësore e ish-presidentit amerikan Joe Biden ishte dukshëm më serioze se sa e kishte paraqitur zyrtarisht Shtëpia e Bardhë gjatë viteve 2023 dhe 2024, zbulohet në librin e ri “Mëkati Origjinal” nga Jake Tapper (CNN) dhe Alex Thompson (Axios), që do të publikohet më 20 maj.

Sipas autorëve, bashkëpunëtorët më të ngushtë të presidentit kishin zhvilluar biseda të brendshme për mundësinë që Biden të përfundonte në karrocë për invalidë nëse fitonte zgjedhjet dhe niste një mandat të ri. Këto diskutime pasqyrojnë përkeqësimin fizik të thellë të presidentit 81-vjeçar, me theks të veçantë në degjenerimin e shtyllës kurrizore.

Në libër thuhet se këshilltarët e Shtëpisë së Bardhë, pavarësisht shqetësimeve, kishin vendosur ta mbanin të fshehur gjendjen e vërtetë për të shmangur dëmet politike në garën kundër Donald Trumpit.

“Rënia fizike, e dukshme përmes ecjes së ngadaltë, ishte aq e theksuar sa u mor në shqyrtim përdorimi i karrocës për invalidë, por kjo u konsiderua politikisht e papranueshme gjatë fushatës”, shkruajnë autorët.

Frika u intensifikua pas incidentit në qershor 2023, kur Biden u pengua nga një thes rëre gjatë ceremonisë në Akademinë e Forcave Ajrore. Pas kësaj, u ndërmorën masa shtesë sigurie: u zgjodhën rrugë më të shkurtra për lëvizje, u kërkua përdorimi i dorezave, Biden filloi të përdorte më shpesh atlete, ndërsa stafi e shoqëronte nga afër në çdo paraqitje publike.

Mjeku personal i presidentit, Kevin O’Connor, thuhet se disa herë kishte paralajmëruar se detyra po ndikonte negativisht në shëndetin e Bidenit dhe kishte këshilluar më shumë kohë pushimi. Autorët shkruajnë se O’Connor madje ironizonte duke thënë se “stafi po përpiqet ta vrasë Bidenin”, ndërsa ai “po përpiqet ta mbajë gjallë”.

Shtëpia e Bardhë më herët kishte pretenduar se ecja e ngadaltë e presidentit ishte pasojë e një thyerjeje të këmbës në vitin 2020, por dokumentet mjekësore të asaj kohe tregojnë se frakturat ishin shëruar plotësisht. Zyrtarisht, si shkak më i shpeshtë përmendej artriti i rëndë në shtyllën kurrizore.

Libri bazohet në mbi 200 intervista me figura kyçe të Partisë Demokratike, shumica e të cilave janë realizuar pas zgjedhjeve të vitit 2024. Autorët pohojnë se si Biden ashtu edhe familja e tij ishin të vendosur të vazhdonin garën, pavarësisht shenjave të përkeqësimit fizik dhe mendor.

Megjithatë, një debat i dështuar me Donald Trumpin në qershor 2024 u bë momenti vendimtar. Pas reagimeve të ashpra brenda Partisë Demokratike, Biden u tërhoq nga gara tre javë më pas dhe mbështeti zëvendëspresidenten Kamala Harris si kandidate të re.

Zëdhënësi i Shtëpisë së Bardhë, në një koment për Axios, hodhi poshtë pretendimet e librit, duke deklaruar se “kontrolli mjekësor i presidentit tregon për një ecje të ngurtësuar, por pa pasoja serioze ose nevojë për terapi”.

“Po, ka ndryshime fizike për shkak të moshës, por nuk ka asnjë provë që të tregojë paaftësi mendore. Ai ka qenë një president shumë efektiv”, thuhet në deklaratën nga ekipi i Bidenit.