Trump njofton planin për heqjen e sanksioneve ndaj Sirisë

Lajme

Gazeta Express

13/05/2025 23:27

Presidenti amerikan Donald Trump deklaroi të martën se planifikon të heqë sanksionet ndaj Sirisë, pas rënies së regjimit të Bashar al-Asadit, duke e cilësuar këtë si një hap që do t’i “japë një shans për madhështi” vendit të shkatërruar nga lufta.

Në një fjalim gjatë një forumi investimesh në Arabinë Saudite, Trump tha se vendimi është marrë pas konsultimeve me Princin e Kurorës Saudite, Mohammed bin Salman, dhe Presidentin e Turqisë, Recep Tayyip Erdogan. Ai theksoi se administrata e tij ka nisur hapat e parë për rivendosjen e marrëdhënieve diplomatike me Sirinë, për herë të parë pas më shumë se një dekade.

“Siria ka përjetuar trazira, luftëra dhe vrasje për shumë vite,” tha Trump, duke njoftuar se Sekretari i Shtetit Marco Rubio do të takohet me ministrin e jashtëm të Sirisë në Turqi gjatë kësaj jave.

Rënia e regjimit të Asadit ndodhi gjatë administratës Biden në dhjetor, dhe qeveria e re siriane ka shpresuar që Trump, në rikthimin e tij në skenën ndërkombëtare, të shqyrtojë lehtësimin e masave ndëshkuese.

“Sanksionet ishin brutale dhe shkatërruese… por tani është koha e tyre të shkëlqejnë,” u shpreh Trump. “Kështu që unë them: ‘Paç fat, Siri!’ Na trego diçka shumë të veçantë.”

Ai përfundoi duke shprehur shpresën se udhëheqësit e rinj në Damask do të arrijnë të stabilizojnë vendin dhe të ruajnë paqen.