Rama drejt mandatit të katërt, PS kryeson zgjedhjet me 83 mandate

Shqiperi

Gazeta Express

12/05/2025 16:10

Procesi i numërimit të votave nga zgjedhjet e 11 majit vijon, ndërsa rezultatet paraprake nga 30% e qendrave të votimit konfirmojnë një fitore të Partisë Socialiste, e cila po avancon drejt mandatit të katërt qeverisës. Deri tani janë numëruar 2307 nga 5225 qendra të votimit dhe PS ka marrë 52.6% të votave, duke siguruar 83 mandate në Kuvend.

Koalicioni Partia Demokratike – Aleanca për Shqipërinë e Madhe, i drejtuar nga Sali Berisha, shënon rënie të ndjeshme me vetëm 34.4% të votave dhe 50 mandate – një humbje prej 13 mandatesh krahasuar me vitin 2021.

Në qarkun më të madh elektoral, Tiranë, PS kryeson me 48.8% të votave dhe 19 mandate. PD-ASHM renditet e dyta me 34.4% dhe vetëm 13 mandate, një rënie prej 4 mandatesh. Ndërkohë, Agron Shehaj me partinë “Mundësia” ka surprizuar duke marrë 4.9% dhe 2 mandate.

Forcat e tjera në parlament

• Partia Socialdemokrate: 4% – 3 mandate
• Nisma Shqipëria Bëhet: 3.3% – 1 mandat
• Partia Mundësia: 2.7% – 2 mandate
• Lëvizja Bashkë: 1.3% – 1 mandat

Fitore të thella për PS në qarqe kyçe

• Dibër: PS përmbys rezultatin dhe merr 3 mandate me 58.2%, PD bie në 2.
• Elbasan: PS me 61.3% fiton 10 mandate (+2), PD bie në 4 mandate.
• Fier: PS rritet në 12 mandate, nga 9 në 2021; PD bie nga 7 në 4.
• Lezhë: PS përmbys rezultatin, merr 4 mandate; PD zbret në 3.
• Shkodër: PS merr 4 mandate (+1), PD bie në 5 mandate (-1).

Janë numëruar vetëm 1660 zarfe nga 194,889 gjithsej. Rezultatet paraprake tregojnë një garë të ngushtë:

• PD: 43.95%
• PS: 42.68%