PSG-ja dëshiron t’ia ‘rrëmbejë’ një lojtar Real Madridit

Sport

Gazeta Express

08/05/2025 21:30

Paris Saint-Germain po përjeton një nga momentet më të ëmbla në historinë e tij të fundit.

Nën drejtimin e Luis Enrique, skuadra franceze ka arritur të kualifikohet në finalen e UEFA Champions League pasi kaloi Arsenalin në Parc des Princes, dhe trajneri spanjoll tashmë po mendon për mënyrat sesi ta përforcojë më tej skuadrën për të ardhmen e afërt.

Luis Enrique, i emocionuar dukshëm pas këtij kualifikimi historik, e bëri të qartë në një konferencë për shtyp se objektivi i tij që nga dita e parë ishte të linte gjurmë në klub.

Megjithatë, ai është i vetëdijshëm se kërkesat do të rriten edhe më shumë, sidomos për shkak të investimit të madh nga presidenti Nasser Al-Khelaifi dhe Emiri i Katarit.

Për këtë arsye, ai e ka përmendur drejtpërdrejt Eduardo Camavinga-n si prioritet për të përforcuar skuadrën.

Mesfushori francez, aktualisht pjesë e Real Madridit, ka pasur një sezon të trazuar, të shënuar nga shqetësime fizike dhe paraqitje nën nivel. Megjithatë, klubi “merengues” nuk ka ndërmend ta lërë të largohet, i bindur se potenciali i tij mbetet i paprekur.

Gjithsesi, PSG nuk dorëzohet lehtë.

Sipas ‘DefensaCentral’, Luis Enrique beson se Camavinga do të përshtatej në mënyrë të përkryer në sistemin e tij falë kapaciteteve fizike dhe fleksibilitetit taktik. Parisi është i gatshëm të bëjë një ofertë të rëndësishme për të bindur Madridin dhe vetë lojtarin.

Ndërkohë, Camavinga është i fokusuar tek rikuperimi dhe pret të ketë një bisedë këtë verë me trajnerin e ardhshëm të Real Madridit, me shumë gjasë Xabi Alonso, për të kuptuar rolin e tij në projektin e ri. Reprezentuesi francez dëshiron të qartësojë pozicionin e tij përfundimtar në fushë dhe të bëjë një hap përpara në karrierën e tij, edhe pse nuk e përjashton plotësisht mundësinë e sfidave të reja./GazetaExpress/