Burri që nuk u ul për pesë ditë rresht tregon çfarë ndodhi me trupin e tij

Shneta tjera

Gazeta Express

06/05/2025 22:30

Ekspertët kanë thënë prej kohësh se qëndrimi në këmbë është më i shëndetshëm se të ulesh – por një eksperiment i lodhshëm i ndërmarrë nga një burrë ka zbuluar se ndoshta nuk është aq i dobishëm sa kemi menduar.

Në një video në YouTube që ka mbledhur gati katër milionë shikime, Lucas Ball, një “kaskader i vetë-certifikuar” nga SHBA, vendosi të mos ulej për pesë ditë për të testuar përfitimet shëndetësore të qëndrimit në këmbë.

Për 16 orë çdo ditë, ai qëndroi në këmbë dhe lejohej të pushonte vetëm gjatë gjumit, për të cilin kishte vendosur një timer strikt prej tetë orësh.

Megjithatë kishte disa përjashtime – për shembull kur qëndronte ulur mbi tualet apo kur duhej të ngiste makinën – por nuk e linte të pasmen të prekte sediljen.

“Pra, jam ngritur në këmbë. Nuk mund të ulem më. Ky udhëtim ka filluar,” tha ai në fillim të eksperimentit, transmeton GazetaExpress.

Duke komentuar për përdorimin e tavolinës së tij për qëndrim në këmbë, Ball tha se në fillim kishte parë rezultate premtuese, pasi kjo pozitë e bënte të ndihej “produktiv”, pa shumë mundësi për t’u shpërqendruar.

“Kisha shumë energji dhe as që më shkonte ndërmend të ulesha,” tha ai.

Në video shihet duke parë televizor, duke ngrënë darkë dhe duke bërë ushtrime fizike si ngritje peshe – të gjitha ndërsa qëndron në këmbë.

Por që nga dita e tretë, eksperimentit filloi t’i merrej haku: qëndrimi i trupit të tij u përkeqësua dhe ai filloi të shtonte në peshë.

 “Në ditën e tretë, më goditi fort në këmbët e poshtme dhe shputa; ndihesha shumë i lodhur dhe i dhimbshëm. Përveç kësaj, isha jashtëzakonisht i uritur,” duke shtuar se ngrënia e shpërqendronte nga dhimbja.

“Ndoshta isha i uritur nga djegia e më shumë kalorive, por ajo që vura re është se kur haja, më zhvendosej vëmendja nga qëndrimi në këmbë. Për këtë arsye, hëngra gjatë gjithë ditës pa pushim.”

“Kur u afrova nga fundi dhe fillova të relaksohesha, aty u shfaq lodhja dhe dhimbja e vërtetë,” shtoi ai, duke treguar se edhe kur ishte në shtrat nuk gjente rehati për shkak të dhimbjes në këmbë.

“Ka qenë e vështirë të zgjohesha, të ngrihesha, të ecja përreth.”

Në fund të pesë ditëve, ai tha se qëndrimi i tij trupor ishte përkeqësuar – pjesa e sipërme e shpinës ishte më e lakuar përpara në një pozicion përkulës.

Përveç dhimbjeve në nyje si në gjunjë dhe ijë, ai shtoi një paund (rreth 0.45 kg) në peshore.

Ai tha: “Ija dhe gjunjët e mi kanë filluar të më dhembin në një mënyrë që nuk është vetëm muskulore.”

“Duket sikur po shkoj drejt një drejtimi negativ për sa i përket këtij eksperimenti, por kam përjetuar shumë gjëra të reja dhe shumë momente që më hapën sytë.”

Megjithatë, kishte edhe një anë pozitive.

Në fund të eksperimentit, pjesa e poshtme e shpinës së tij ndihej “jashtëzakonisht mirë” dhe më pak e tensionuar.

Për më tepër, ai zhvilloi një hark shtesë në pjesën e poshtme të shtyllës kurrizore, i cili njihet për përmirësimin e ekuilibrit dhe fleksibilitetit.

YouTuberi vuri re gjithashtu se tretja e tij ishte “më e shpejtë dhe më e lehtë”, pasi graviteti ndihmon që ushqimi të kalojë më shpejt nga stomaku.

Njerëzit në Mbretërinë e Bashkuar kalojnë mesatarisht rreth nëntë orë në ditë duke qëndruar ulur.

Kjo vjen ndërkohë që një studim i publikuar së fundmi në International Journal of Epidemiology zbuloi se qëndrimi në këmbë më shumë se ulur nuk e ul rrezikun për probleme të zemrës apo të enëve të gjakut.

Studiuesit australianë, të cilët ndoqën modelet e aktivitetit fizik të më shumë se 80,000 njerëzve në MB, zbuluan se qëndrimi në këmbë për dy orë në ditë bënte shumë pak për të ulur shanset për të zhvilluar probleme të qarkullimit.

Dr. Matthew Ahmadi, ekspert në shëndetin e popullsisë në Universitetin e Sidneit dhe autor kryesor i studimit, tha: “Qëndrimi për shumë gjatë në këmbë nuk e kompenson një mënyrë jetese sedentare dhe mund të jetë i rrezikshëm për disa njerëz për sa i përket shëndetit të qarkullimit të gjakut.”

“Ne zbuluam se qëndrimi më shumë në këmbë nuk përmirëson shëndetin kardiovaskular në planin afatgjatë dhe madje rrit rrezikun për probleme të qarkullimit.” /GazetaExpress/