Një tjetër dështim i Arsenalit, humbet dhe rrezikon pozitën e dytë në Premier Ligë

Futboll

Gazeta Express

03/05/2025 20:32

Shpresat e Arsenalit për vendin e dytë marrin goditje të madhe pas humbjes e ndaj Bournemouth në shtëpinë e tyre

Shpresat e Arsenalit për ta mbyllur sezonin në vendin e dytë të Premier League morën një goditje të rëndë pas një humbjeje befasuese 2-1 ndaj Bournemouth, që shënoi për herë të parë “dopietën” sezonale kundër “Topçinjve”.

Edhe pse lojtarët e Mikel Artetës mund të justifikohen për faktin që mendjen e kishin te ndeshja e dytë gjysmëfinale e Ligës së Kampionëve ndaj PSG-së të mërkurën, ata nuk kishin luksin të qetësoheshin pasi një vend në top pesë ende nuk është siguruar.

Declan Rice bëri paraqitjen e tij të 100-të me Arsenalin dhe pati rastin e parë të ndeshjes, por goditja e tij diagonale shkoi jashtë, pas një kombinimi të bukur me Martin Ødegaard dhe Gabriel Martinelli. Më pas, Rice goditi sërish jashtë, këtë herë pas një pasimi nga Martinelli, teksa vendasit po nisnin të hynin në ritëm.

Megjithatë, rasti më i pastër në 25 minutat e para i takoi Bournemouth-it, kur Evanilson goditi me kokë nga afër pas një krosimi të Milos Kerkez, por topi shkoi mbi traversë. Martinelli vazhdonte të krijonte telashe në krahun e majtë dhe shërbeu një top të shkëlqyer për Leandro Trossard, i cili goditi me kokë, por u ndal nga Kepa Arrizabalaga.

Goli erdhi nga Rice, i cili mori në mënyrë të shkëlqyer një pasim në thellësi nga Ødegaard, shmangu Kepën dhe shënoi në portën bosh. Megjithatë, mbrojtja e Arsenalit dukej e pasigurt dhe një goditje nga distanca e Evanilson që kaloi ngushtë mbi traversë, pas daljes së gabuar të David Raya-s, ishte një paralajmërim serioz për rrezikun e mysafirëve.

Në pjesën e dytë, Arsenal kërkoi me ngulm golin e dytë, me Bukayo Saka shumë aktiv. Ai u shërbye bukur nga Myles Lewis-Skelly, depërtoi nga e djathta dhe goditi, por topi përfundoi jashtë shtyllës së largët.

Megjithatë, në minutën e 67-të, Bournemouth barazoi me një gol të thjeshtë, por efektiv. Antoine Semenyo sapo kishte hyrë në lojë dhe realizoi një out të gjatë në zonë drejt Dean Huijsen, i cili me një goditje të shkëlqyer me kokë e kaloi topin mbi Raya-n.

Dhe Bournemouth nuk u ndal me kaq. Evanilson i tronditi tribunat e Emirates me një përfundim të çuditshëm në shtyllën e largët, pas një devijimi nga Marcus Tavernier nga goditja e këndit e Alex Scott. Goli iu nënshtrua një verifikimi të gjatë nga VAR për pozicion jashtë loje dhe prekje me dorë, por u pranua, edhe pse pamjet sugjeronin se topi e kishte prekur dorën e sulmuesit përpara se të shkonte në rrjetë.

Skuadra e Andoni Iraola-s arriti të ruajë avantazhin dhe regjistroi fitoren e parë në histori në fushën e Arsenalit, duke u ngjitur në vendin e tetë në tabelë dhe duke forcuar shpresat për pjesëmarrje në Evropë për herë të parë.

Ndërkohë, Arsenal pësoi humbjen e dytë radhazi në shtëpi për herë të parë pas 16 muajsh dhe tani e shikon me ankth betejën për një vend në top pesë. /GazetaExpress/