Rama: Kontrata e lobimit të PD, dardhë me bishtin e gjatë

Shqiperi

Gazeta Express

02/05/2025 20:52

Kryeministri Edi Rama gjatë takimit elektoral në Dibër ka komentuar kontratën e lobimit në SHBA me vlerë 6 milionë dollarë. Nga Burreli dhe Peshkopia, Rama e cilësoi marrëveshjen si “një dardhë me bisht shumë të gjatë”.

“Nuk kishim parë gjë akoma. 7×7, 6 milionë. Dhe pastaj thonë: aq bëjnë, por s’janë të miat. Po të kujt janë? Janë ca patriot që nuk i njoh, por i ka lind në zemër të hedhin 6 milionë për Shqipërinë dhe të kërkojnë garanci nga PD? Ou? Megjithatë, kjo është një dardhë që do nxjerrë bishtin shumë vonë. Jam i sigurt për këtë”, deklaroi Rama.

Rama u bëri thirrje dibranëve që më 11 maj të “derdhen lumë drejt kutive të votimit”, duke kërkuar një shumicë për të shmangur, sipas tij, “pengmarrjen e vendimeve të rëndësishme për integrimin” nga opozita.

Ndërkohë, kreu i PD Sali Berisha reagoi për herë të parë publikisht mbi kontratën ditën e djeshme, duke e quajtur atë si një akt në shërbim të interesit kombëtar: “Kontrata është për marrëdhëniet PD–Shqipëri–SHBA. Jo vetëm për PD, por për çdo shqiptar. McGonigal do ta marrë me vete Ramën”, tha Berisha në një konferencë për media më 1 maj.

“E vërteta e kësaj kontrate që djeg kaq shumë Ramën dhe aleatët e tij të paguar është se ajo nuk është fshehur. Por përpjekjet për të zënë hapësirat mediatike me këtë temë, në vend të programit për qytetarët, janë të dëmshme”, shtoi Berisha.