Shqipëria ngjitet në indeksin e lirisë së medias, progres në raportin e Reporterëve pa Kufij

Shqiperi

Gazeta Express

02/05/2025 18:10

Shqipëria ka shënuar përmirësim në raportin vjetor për lirinë e shtypit të organizatës ndërkombëtare Reporterët pa Kufij, duke u renditur në vendin e 80-të nga gjithsej 180 shtete, një ngritje e ndjeshme krahasuar me vitin e kaluar, kur ishte në vendin e 99-të.

Raporti, i publikuar në prag të Ditës Botërore të Lirisë së Shtypit, vlerëson progresin e bërë në disa fusha, por thekson se peizazhi mediatik në Shqipëri vijon të jetë i dominuar nga konfliktet e interesit, ndikimi politik dhe presioni ekonomik ndaj mediave. Problemet me transparencën e pronësisë së mediave dhe mungesa e ndarjes së qartë mes përmbajtjes editoriale dhe interesave të biznesit mbeten sfida të vazhdueshme.

Përmirësimi i pozicionit në indeks reflekton disa zhvillime pozitive në trajtimin e gazetarëve, rritjen e ndërgjegjësimit për rolin e medias dhe presionin publik për më shumë liri dhe pavarësi redaksionale. Megjithatë, organizata Reporterët pa Kufij nënvizon se progresi është i brishtë dhe kërkon përpjekje të qëndrueshme për garantimin e lirisë së fjalës dhe sigurisë së gazetarëve.